რა არის საჭირო, თუ მოსწავლეს სტატუსი შეუჩერდა. ეკატერინე დგებუაძის განმარტება

მოსწავლისთვის სტატუსის შეჩერებისთანავე, მეორე დღესვე, როგორც კი მშობელი განცხადებას დაწერს, იმ დღესვე აღუდგება ბავშვს სტატუსი, - განაცხადა განათლებისა და მეცნიერების მინისტრის მოადგილემ, ეკატერინე დგებუაძემ ტელეკომპანია „იმედის“ ეთერში, გადაცემაში „დილის შოუ“.

მისი განცხადებით, სამინისტროს მიზანი არაა, მოსწავლეს სტატუსი შეუჩერდეს.

„მშობელმა უნდა იცოდეს, რომ გარკვეული პერიოდის შემდეგ, მის შვილს სტატუსი შეუჩერდება, მაგრამ იქამდე, არ მოვასვენებთ და ბავშვის უფლებებისთვის ვიმუშავებთ, რომ სკოლაში მოვიდეს. ალბათ, მშობელსაც სჭირდება ცნობიერების კუთხით მუშაობა, რათა გააცნობიეროს განათლების მნიშვნელობა და ღირებულება. რა თქმა უნდა, სკოლა ყოველთვის ღიაა. კონსტიტუციით გარანტირებული უფლებაა, რომ ყველა ადამიანმა, რომელიც საქართველოში ცხოვრობს, მიიღოს განათლება. ეს ჩარევები არის იმისთვის, რომ ეს უფლება დავიცვათ“ - განაცხადა ეკატერინე დგებუაძემ.

მინისტრის ახალი ბრძანების მიხედვით, პირველ ეტაპზე, მოსწავლის სკოლაში/გაკვეთილზე გამოუცხადებლობის შემთხვევაში, ყოველდღიური მონიტორინგის საფუძველზე, არაუგვიანეს მე-10 დღეს, კლასის დამრიგებელი ვალდებულია, სკოლის ადმინისტრაციას წარუდგინოს წერილობითი ანგარიში.

ამასთან, მთავრობის დადგენილებით, იმ შემთხვევაში, თუ ტექნიკური პრობლემების გამო მოსწავლეს არ აქვს წვდომა „ტელესკოლასა“ და ონლაინსწავლებაზე, მასწავლებელი ვალდებულია, უზრუნველყოს მასთან კომუნიკაცია ნებისმიერი, მათ შორის სატელეფონო ფორმით. ხოლო მოსწავლის კანონიერი წარმომადგენელი ვალდებულია, ითანამშრომლოს სკოლასთან. ყველა ამ ფაქტორის გათვალისწინებით, მოსწავლე დისტანციური სწავლების დროს სტატუსი შეჩერებისგან დაცულია.

ზედიზედ გაცდენილი 20 სასწავლო დღის შემდეგ კი, პროცესში კლასის დამრიგებელთან ერთად, განათლების სისტემის სოციალური მუშაკები ჩაერთვებიან, რომლებსაც აქვთ ვალდებულება, ინფორმაციის მიღებიდან 2 სამუშაო დღის განმავლობაში მივიდნენ ოჯახში. იმ შემთხვევაში, თუ მოსწავლე, არასაპატიო მიზეზების გამო, სკოლაში მაინც არ გამოცხადდა, მას მოსწავლის სტატუსი უჩერდება.

აქამდე, მოსწავლისთვის სტატუსის შეჩერების საფუძვლად 90 სასწავლო დღის განმავლობაში სკოლის ზედიზედ გაცდენა ითვლებოდა. გარდა ამისა, იმ შემთხვევაში, თუ მოსწავლე 90-დღიანი ვადის ამოწურვამდე ერთხელ მაინც გამოცხადდებოდა სკოლაში, მისთვის გაცდენების აღრიცხვა თავიდან იწყებოდა.