მეუფე იაკობი: ივერი მელაშვილი ჩემთვის კაციც არ არის, მიწა, სადაც 6 000 ბერის სისხლია დაღვრილი, უდიერად მოიხსენია

გამოვიდა ციხიდან და ჩემი მიწა, სადაც 6 000 ბერის სისხლია დაღვრილი, ისე უდიერად მოიხსენია, თქვენი არ არის, სხვისიაო - ის ჩემთვის კაციც არ არის. როგორც გინდათ, ისე შეაფასეთ, უვარგისი ადამიანია და დაეტიოს. მაგას ურჩევნია ოპოზიციურ პარტიებში იაროს, - ამის შესახებ ბოდბელმა ეპისკოპოსმა იაკობმა ივერი მელაშვილზე განაცხადა.

იგი აღნიშნული კომენტარით რამდენიმე დღის წინ გარეჯში მომხდარ ინციდენტს გამოეხმაურა და განაცხადა, რომ ფიზიკური ძალადობა მიუღებელია. მეუფემ მედიის ძალადობაზეც ისაუბრა.

„ძალადობას რომ გაიძახით, პირადად ჩემზე ისეთი ძალადობა მიდის მედიაში, მირჩევნია, ხმალი აიღოთ, თავი მომაჭრათ. გააჩნია, ძალადობას რას უწოდებთ. ივერის რომ დაუდგები გვერდით და გადაიღებ, სამწუხაროდ, შეიძლება არაფერ შუაშია არ იყო, მაგრამ აგრესია შენზეც წამოვიდეს და ივერი გადაარჩინო. თორემ, მეც არ მომწონს, ადამიანები ვირები არ არიან, რომ ხელი დაარტყა. ძალადობაზე თუ ვიტყვით, მედია-ძალადობაზეც უნდა ვილაპარაკოთ. ყველაფერზე უნდა ვილაპარაკოთ და უნდა შევთანხმდეთ, რა შეიძლება და რა არა“, - განაცხადა მეუფე იაკობმა.

მისი თქმით, ივერი მელაშვილმა უდიერად მოიხსენია მიწა, სადაც 6 ათასი გარეჯელი ბერის სისხლია დაღვრილი.

„უბრალოდ იცით რა არის? ისეთ პერიოდში დაიჭირეს, სალაპარაკო გაუხდა ხალხს. მოეკიდათ ხელი მანამდე, ვის გაახსენდებოდა. ჩემი მიწაზე, სადაც 6 000 ბერის სისხლია დაღვრილი, გამოვიდა ციხიდან და ისე უდიერად მოიხსენია, თქვენი არ არის, სხვისიაო, ის ჩემთვის კაციც არ არის. როგორც გინდათ, ისე შეაფასეთ, უვარგისი ადამიანია და დაეტიოს. მაგას ურჩევნია ოპოზიციურ პარტიებში იაროს, ვინც ტაშს უკრავდა. მაგას ქართველ ხალხთან გამოსაყოფი ცხვირი არ აქვს. როგორც გინდათ, ისე შეაფასეთ. ჩვენ სხვანაირად ვეპყრობით ჩვენი ერის მტრებს - გამოვიდა და არ არის ჩვენიო.

ვიცით, რომ მიდის მოლაპარაკებები და ორივე მხარისთვის მისაღებ შედეგს ველოდებით. ამ დროს კიდევ, ვიღაც ივერი მელაშვილი, მიწათმომწყობი, რომელიც კარტოგრაფიც არ არის, ჩემს მიწაზე ამბობს - არ არის თქვენიო“, - განაცხადა მეუფე იაკობმა.