შალვა პაპუაშვილი: მთავარი არის, რომ ნინოწმინდის პანსიონში ბავშვების უფლებები იყოს დაცული და საზოგადოებაში არ არსებობდეს ეჭვიც კი, რომ ეს უფლებები ირღვევა

მთავარი არის 2 რამ: ამ დაწესებულებაში ბავშვების უფლებები იყოს დაცული და მე-2 საზოგადოებაში არ არსებობდეს ეჭვიც კი იმასთან დაკავშირებით, რომ ეს უფლებები ირღვევა, - ამის შესახებ ნინოწმინდის პანსიონში შეხვედრის შემდეგ განათლებისა და მეცნიერების კომიტეტის თავმჯდომარე შალვა პაპუაშვილმა განაცხადა.

„მთავარი არის 2 რამ: ამ დაწესებულებაში ბავშვების უფლებები იყოს დაცული და მე-2 საზოგადოებაში არ არსებობდეს ეჭვიც კი იმასთან დაკავშირებით, რომ ეს უფლებები ირღვევა. ეს 2 საკითხი დღეს სრულად არის გარანტირებული იმით, რომ არის დაცული და სოც. მუშაკები არიან როგორც დღისით, ისე ღამით. ჩვენ გვქონდა საუბარი დაწესებულების ხელმძღვანელობასთან და ჩვენ ამაზე შევთანხმდით, რომ ეს არის ყველას მათ შორის დაწესებულების ინტერესიც“, - განაცხადა პაპუაშვილმა.

ნინოწმინდის ბავშვთა პანსიონში, სავარაუდო ძალადობის შესახებ, თავად ბენეფიციარები „ქრონიკასთან“ ალაპარაკდნენ. ერთ-ერთი ასეთი ფაქტი, მათივე თქმით, ორი დღის წინ მოხდა. არასრულწლოვნები ამბობენ, რომ შემთხვევების შესახებ მეუფე სპირიდონი არ იყო ინფორმირებული, მათზე აღმზრდელები ზემოქმედებნენ. რომელთა ნაწილი გათავისუფლებულია, თუმცა ნაწილი ისევ ადგილზე რჩება. კითხვაზე - იცოდა თუ არა მეუფე სპირიდონმა ამ ფაქტების შესახებ, ბავშვები ამბობენ, რომ მათ ვერ შეძლეს მეუფესთვის ეთქვათ, როგორ ძალადობდნენ მათზე აღმზრდელები და ასევე ვერ მოახერხეს, რომ ეს ამბავი ვინმესთვის ეთქვათ.

3 ივნისს შსს-მ ნინოწმინდის ბავშვთა პანსიონში აღსაზრდელების მიმართ შესაძლო დანაშაულის ჩადენის ფაქტებზე გამოძიება დაიწყო.

სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოს 4 მაისს გავრცელებული განცხადების თანახმად, ნინოწმინდის პანსიონის დატოვების სურვილი 6-მა არასრულწლოვანმა გამოთქვა და სააგენტომ უკვე უზრუნველყო მათი სხვა ზრუნვის ფორმაში გადაყვანა. ამავე განცხადების მიხედვით, კიდევ 10 ბავშვის გადაყვანაზე მიმდინარეობდა მუშაობა. 4 ივნისს ჯანდაცვის სამინისტროს წარმომადგენლებმა ნინოწმინდის პანსიონიდან რამდენიმე არასრულწლოვანი გამოიყვანეს.