საპატრიარქოს კომისიის წევრის განცხადებით, მშობლების სურვილის საფუძველზე, ნინოწმინდის პანსიონი ხუთმა ბავშვმა დატოვა

საქართველოს საპატრიარქოს სპეციალური კომისიის წევრი, ვეფხია ოდიშარია აცხადებს, რომ ნინოწმინდის პანსიონი, მშობლების სურვილის საფუძველზე, ხუთმა ბავშვმა დატოვა.

„სოციალურ მუშაკებთან ერთად, ვაკვირდებით პროცესს. ჩამოვიდა რამდენიმე ადამიანი. ერთი იყო ბავშვის ბიძა, რომელსაც ადრე ჰქონდა გადაწყვეტილი ბავშვის გაყვანა. როგორც ჩვენ გვითხრეს, ის ზაფხულობით გაჰყავთ ხოლმე. წეღან კიდევ წაიყვანეს ბავშვები. სულ ხუთი ბავშვი გაიყვანეს. ესენია შემთხვევები, როცა გადაწყვეტილი ჰქონდათ და როგორც გვითხრეს, ისინი ზაფხულობით გაჰყავდათ ხოლმე. კომისიას გაწერილი აქვს გეგმა და ამ გეგმის მიხედვით, სოციალურ სამსახურთან ერთად, ვაკვირდებით და ვსწავლობთ სიტუაციას. როგორც პირველივე დღეს მოგახსენეთ, ყველაფერი იქნება შესწავლილი და ჩვენი მხრიდან, დასკვნა დაიდება“, - აცხადებს ვეფხია ოდიშარია.

დღეს საპატრიარქომ გამოაქვეყნა განცხადება, რომელშიც წერია, რომ გაასაჩივრებენ სასამართლოს გადაწყვეტილებას, რომელიც ნინოწმინდის პანსიონიდან ბენეფიციართა გამოყვანის პროცესს ეხება.

თბილისის საქალაქო სასამართლოს დროებითი განჩინების მიხედვით, „პარტნიორობა ადამიანის უფლებებისთვის“ შუამდგომლობა ნინოწმინდის ბავშვთა პანსიონიდან ყველა ბავშვის გაყვანასთან დაკავშირებით ნაწილობრივ დაკმაყოფილდა.

შეგახსენებთ, არასამთავრობო ორგანიზაციამ „პარტნიორობა ადამიანის უფლებებისთვის“ თავმჯდომარე ანა აბაშიძემ 5 მაისს გამართულ პრესკონფერენციაზე განაცხადა, რომ სასამართლომ ნინოწმინდის პანსიონიდან ბავშვების გაყვანის გადაწყვეტილება მიიღო.

PHR-მა 4 ივნისს მიმართა სასამართლოს შუამდგომლობით და მოითხოვა, უზრუნველყოფის ღონისძიების სახით ნინოწმინდის ბავშვთა პანსიონიდან დაუყოვნებლივ ყველა ბავშვის გამოყვანა.

ნინოწმინდის ბავშვთა პანსიონში, სავარაუდო ძალადობის შესახებ, თავად ბენეფიციარები „ქრონიკასთან“ ალაპარაკდნენ. ერთ-ერთი ასეთი ფაქტი, მათივე თქმით, ორი დღის წინ მოხდა. არასრულწლოვნები ამბობენ, რომ შემთხვევების შესახებ მეუფე სპირიდონი არ იყო ინფორმირებული, მათზე აღმზრდელები ზემოქმედებნენ. რომელთა ნაწილი გათავისუფლებულია, თუმცა ნაწილი ისევ ადგილზე რჩება. კითხვაზე - იცოდა თუ არა მეუფე სპირიდონმა ამ ფაქტების შესახებ, ბავშვები ამბობენ, რომ მათ ვერ შეძლეს მეუფესთვის ეთქვათ, როგორ ძალადობდნენ მათზე აღმზრდელები და ასევე ვერ მოახერხეს, რომ ეს ამბავი ვინმესთვის ეთქვათ.

3 ივნისს შსს-მ ნინოწმინდის ბავშვთა პანსიონში აღსაზრდელების მიმართ შესაძლო დანაშაულის ჩადენის ფაქტებზე გამოძიება დაიწყო.

სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოს 4 მაისს გავრცელებული განცხადების თანახმად, ნინოწმინდის პანსიონის დატოვების სურვილი 6-მა არასრულწლოვანმა გამოთქვა და სააგენტომ უკვე უზრუნველყო მათი სხვა ზრუნვის ფორმაში გადაყვანა. ამავე განცხადების მიხედვით, კიდევ 10 ბავშვის გადაყვანაზე მიმდინარეობდა მუშაობა. 4 ივნისს ჯანდაცვის სამინისტროს წარმომადგენლებმა ნინოწმინდის პანსიონიდან რამდენიმე არასრულწლოვანი გამოიყვანეს.