მეუფე ნიკოლოზი სასამართლოს განჩინებაზე: რა თქმა უნდა, გავასაჩივრებთ, რადგან მას არ ვეთანხმებით

„სამართლებრივი წესით, შეიძლება მოსამართლის განჩინების გასაჩივრება და რა თქმა უნდა, გავასაჩივრებთ, რადგან მას არ ვეთანხმებით. მოსამართლემ განაჩენი ერთადერთ ვიდეოჩანაწერზე დაყრდნობით გამოიტანა. ეს იყო თავად მეუფე სპირიდონის მიერ გადაღებული ვიდეო, რომელიც Facebook-ის საკუთარ გვერდზე გაავრცელა. ვიდეოში, აღელვებული ბავშვი ამბობს, რომ არსად წასვლა არ უნდა. ცხადია, ამ ჩანაწერში იყო დარღვევები, რადგან, ჯერ ერთი, ბავშვების სახე არ იყო დაფარული, მეორე - ბავშვი აღელვებული ჩანდა. უბრალოდ, მეუფე სპირიდონმა ვერ გადაიღო ისე, რომ გამოჩენილიყო, რა იყო აღელვების მიზეზი“, - განაცხადა ახალქალაქისა და კუმურდოს მიტროპოლიტმა, მეუფე ნიკოლოზმა ნინოწმინდაში, ჟურნალისტებთან საუბრისას.

„ადგილზეა ბევრი, რამდენიც საჭიროა, იმდენი სოცმუშაკი და დაველოდოთ, რას დაასკვნიან ისინი. წინასწარ არ ვიცი, აღმოაჩენენ თუ ვერა დარღვევებს. აქ არიან ფსიქოლოგებიც. მე თავად ვიყავი ჩართული, ყველას ვესაუბრე. ფსიქოლოგები უზრუნველყოფენ, რომ ბავშვებთან კითხვები არასტრესულ ვითარებაში დაისვას“, - განაცხადა მეუფე ნიკოლოზმა.

მისივე თქმით, 18 წლის წინ, მაშინ, როცა პანსიონი ჯერ კიდევ არ იყო მისი ეპარქიის დაქვემდებარებაში, დაწესებულებაში გადაცდომები ნამდვილად იყო.

„რა თქმა უნდა, დარღვევები და გადაცდომები იყო, მაგრამ აღმზრდელების გაშვება, ძირითადად, მოხდა იქამდე, ვიდრე ეს ბავშვთა სახლი ჩემს ეპარქიაში გადმოვიდოდა. 18 წელია, ეს ბავშვთა სახლი ჩემთან, ჩემს ეპარქიაშია. წმინდა სინოდის სხდომაზე დაჟინებით მოვითხოვე, რომ მისი ხელმძღვანელი ყოფილიყო მეუფე სპირიდონი, რომელმაც, საერთოდ, დაიწყო ეს საქმე. სინოდმა ეს თხოვნა დამიკმაყოფილა და რამდენადაც ვიცი, ამ პერიოდში, სიტუაცია შედარებით, სტაბილური გახდა. არაა გამორიცხული, რომ გარკვეული ტიპის ფიზიკური ძალადობა ყოფილიყო, რადგან ლაპარაკია იმაზე, თუ რა ხდებოდა 18 წლის წინ სხვაგან. დღევანდელი გადმოსახედიდან, ამას კი არ ვამართლებ, მაგრამ მაშინ აბსოლუტურად სხვა სტანდარტები იყო. მაშინ საკმარისი იყო, რომ გაეთავისუფლებინათ აღმზრდელი, რომლისგანაც რაიმე ტიპის ფიზიკური ძალადობა იქნებოდა. ბავშვისთვის ყურის აწევაც და მუხლებზე დაყენებაც მიუღებელია, მაგრამ მაშინ სხვანაირი სტანდარტები იყო. დაიხვეწა ეს სტანდარტები, განვითარდა, დღეს სხვანაირად ვცხოვრობთ, სხვა რეალობაში ვართ და ძალიან კარგია, რომ ეს ასეა. რა თქმა უნდა, რამდენიმე ბავშვი ახლაც ამბობს, რომ ეს ახლაც არის, მაგრამ რასაც ეს ბავშვები ამბობენ, მე არ მსმენია. ოდნავ მაინც რომ გამჩენოდა რაიმე ეჭვი, მერწმუნეთ, რომ ეს საქმე აქამდე არ მოვიდოდა - კამერების წინაშე არ დამჭირდებოდა ლაპარაკი, თავად მოვახდენდი რეაგირებას, აუცილებლად ჩავაყენებდი საქმის კურსში პატრიარქს, წმინდა სინოდს... რომ ყოფილიყო რაიმე ასეთი. პირველ რიგში, მეუფე სპირიდონს დაველაპარაკებოდი“, - განაცხადა მეუფე ნიკოლოზმა.

ჯანდაცვის სამინისტროს ინფორმაციით, სახელმწიფო ზრუნვის სააგენტომ ნინოწმინდის პანსიონიდან, ჯამში, 11 არასრულწლოვნის გამოყვანა უზრუნველყო, რომელთა შორის შეზღუდული შესაძლებლობის სტატუსის მქონე ერთი ბავშვია.

დღეს საპატრიარქომ გამოაქვეყნა განცხადება, რომელშიც წერია, რომ გაასაჩივრებენ სასამართლოს გადაწყვეტილებას, რომელიც ნინოწმინდის პანსიონიდან ბენეფიციართა გამოყვანის პროცესს ეხება.

თბილისის საქალაქო სასამართლოს დროებითი განჩინების მიხედვით, „პარტნიორობა ადამიანის უფლებებისთვის“ შუამდგომლობა ნინოწმინდის ბავშვთა პანსიონიდან ყველა ბავშვის გაყვანასთან დაკავშირებით ნაწილობრივ დაკმაყოფილდა.

შეგახსენებთ, არასამთავრობო ორგანიზაციამ „პარტნიორობა ადამიანის უფლებებისთვის“ თავმჯდომარე ანა აბაშიძემ 5 მაისს გამართულ პრესკონფერენციაზე განაცხადა, რომ სასამართლომ ნინოწმინდის პანსიონიდან ბავშვების გაყვანის გადაწყვეტილება მიიღო.

PHR-მა 4 ივნისს მიმართა სასამართლოს შუამდგომლობით და მოითხოვა, უზრუნველყოფის ღონისძიების სახით ნინოწმინდის ბავშვთა პანსიონიდან დაუყოვნებლივ ყველა ბავშვის გამოყვანა.

ნინოწმინდის ბავშვთა პანსიონში, სავარაუდო ძალადობის შესახებ, თავად ბენეფიციარები „ქრონიკასთან“ ალაპარაკდნენ. ერთ-ერთი ასეთი ფაქტი, მათივე თქმით, ორი დღის წინ მოხდა. არასრულწლოვნები ამბობენ, რომ შემთხვევების შესახებ მეუფე სპირიდონი არ იყო ინფორმირებული, მათზე აღმზრდელები ზემოქმედებნენ. რომელთა ნაწილი გათავისუფლებულია, თუმცა ნაწილი ისევ ადგილზე რჩება. კითხვაზე - იცოდა თუ არა მეუფე სპირიდონმა ამ ფაქტების შესახებ, ბავშვები ამბობენ, რომ მათ ვერ შეძლეს მეუფესთვის ეთქვათ, როგორ ძალადობდნენ მათზე აღმზრდელები და ასევე ვერ მოახერხეს, რომ ეს ამბავი ვინმესთვის ეთქვათ.

3 ივნისს შსს-მ ნინოწმინდის ბავშვთა პანსიონში აღსაზრდელების მიმართ შესაძლო დანაშაულის ჩადენის ფაქტებზე გამოძიება დაიწყო.

სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოს 4 მაისს გავრცელებული განცხადების თანახმად, ნინოწმინდის პანსიონის დატოვების სურვილი 6-მა არასრულწლოვანმა გამოთქვა და სააგენტომ უკვე უზრუნველყო მათი სხვა ზრუნვის ფორმაში გადაყვანა. ამავე განცხადების მიხედვით, კიდევ 10 ბავშვის გადაყვანაზე მიმდინარეობდა მუშაობა. 4 ივნისს ჯანდაცვის სამინისტროს წარმომადგენლებმა ნინოწმინდის პანსიონიდან რამდენიმე არასრულწლოვანი გამოიყვანეს.