კახა კალაძე: ვპირდებით ყველას, რომ საზოგადოებრივი ტრანსპორტი გვეყოლება ყველაზე ახალი, ყველაზე თანამედროვე, ყველაზე სუფთა და ყველაზე სწრაფი

„იმედის კვირის“ გადამღები ჯგუფი კახა კალაძეს შეხვდა, რომელმაც თბილისის მერიის სატრანსპორტო პოლიტიკაზე ისაუბრა. დედაქალაქის მერის თქმით, მხოლოდ ავტობუსების პარკის განახლება ქალაქში არსებულ პრობლემებს ვერ მოაგვარებდა, ამიტომ საზოგადოებრივი ტრანსპორტისთვის ცალკე ხაზების გაკეთებაც გახდა საჭირო. ამასთან, კალაძე ამბობს, რომ რკინის ხიდების ნაცვლად, დედაქალაქში ზებრა გადასასვლელების მოწყობა სატრანსპორტო პოლიტიკის ერთ-ერთი მთავარი კომპონენტია, რომ თბილისი ინკლუზიური ქალაქი გახდეს.

„20-მდე ხიდის დემონტაჟი განხორციელდა სხვადასხვა ქუჩაზე და გაჩნდა ზებრა გადასასვლელები, რომლებიც შუქნიშნით რეგულირდება. ასევე, კონკრეტული ქუჩები, სადაც ჩვენ რეაბილიტაცია განვახორციელეთ, ადაპტირებულია მთლიანად შშმ-პირებისთვის და ჩვენი მთავარი მიზანია, რომ ეს ქალაქი იყო ინკლუზიური. ანუ, ადამიანებს არ უნდა შეექმნათ გარკვეული შეფერხებები ქალაქში გადაადგილების დროს“, - აცხადებს კალაძე.

სატრანსპორტო პოლიტიკის კიდევ ერთ მნიშვნელოვან პუნქტად კალაძე ტაქსების რეფორმას მიიჩნევს, თუმცა აღნიშნავს, რომ რეფორმა დასრულებული ჯერ არ არის და კონკრეტული ინფორმაცია ამ საკითხთან დაკავშირებით სავარაუდოდ წლის ბოლოს გაჟღერდება. ასევე მნიშვნელოვანი სატრანსპორტო პოლიტიკისთვის ზონალურ-საათობრივი პარკირების სისტემაა, რომელიც თბილისის რამდენიმე ქუჩაზე უკვე მოქმედებს.

„საერთო ჯამში ყველაფერი მიმართულია იმისკენ, რომ ადამიანებს ვუბიძგოთ ნელ-ნელა გადავიდნენ საზოგადოებრივ ტრანსპორტზე. გარკვეულ დისკომფორტს უნდა წარმოადგენდეს ავტომობილის გაჩერება, შეიძლება ბევრისთვის ძვირი იყო. ამიტომ, ჩვენ ვპირდებით ყველას, რომ საზოგადოებრივი ტრანსპორტი გვეყოლება ყველაზე ახალი, ყველაზე თანამედროვე, ყველაზე სუფთა და ყველაზე სწრაფი“, - აცხადებს კალაძე.