რას ამბობს იმ კლინიკის დირექტორი, რომელშიც ოპერატორი ლექსო ლაშქარავა მკურნალობდა

5 ივლისს მიღებული ძლიერი დაზიანებების შემდეგ, „ტვ პირველის“ ოპერატორი, ლექსო ლაშქარავა კლინიკა „ნიუ ჰოსპიტალსში“ მკურნალობდა. კლინიკის დირექტორმა, გიორგი რამიშვილმა, ოპერატორის გარდაცვალების შემდეგ, პირველი კომენტარი გააკეთა.

„პაციენტი ჩვენთან 5-დან 8 ივლისამდე მკურნალობდა. 8 ივლისს, გაეწერა დამაკმაყოფილებელ მდგომარეობაში. ჩაუტარდა ყველა საჭირო ჩარევა და მანიპულაცია. ამ წუთას, შემთხვევას სწავლობს რეგულირების სააგენტო, რომელთანაც ვთანამშრომლობთ, ვაანალიზებთ პროცესს. ჩვენი მხრიდან, არის სრული თანამშრომლობა, ვაძლევთ ყველა ინფორმაციას. გაწერა სტანდარტის მიხედვით მოხდა. ყველაფერი დანარჩენი არის თეორიები, რომლებზეც, მხოლოდ ექსპერტიზის შემდეგ შეიძლება მსჯელობა. რა თქმა უნდა, გაწერის წინ, ჩაუტარდა კომპიუტერული ტომოგრაფია“, - განაცხადა გიორგი რამიშვილმა.

ლექსო ლაშქარავას გარდაცვალების ფაქტზე, ვაკე-საბურთალოს პოლიციის სამმართველოში, გამოძიება საქართველოს სისხლის სამართლის კოდექსის 115 მუხლით დაიწყო. დაინიშნა სასამართლო-სამედიცინო ექსპერტიზა. გარდაცვლილის ცხედარი გადასვენებულია ექსპერტიზის ბიუროში.

ლექსო ლაშქარავა, რომელიც 5 ივლისის მოვლენების დროს დაშავდა, გამთენიისას, საკუთარ სახლში გარდაიცვალა. ოპერატორს „თბილისი პარაიდის“ მოწინააღმდეგეები, რადიკალურად განწყობილი ჯგუფები სასტიკად გაუსწორდნენ. ის პროფესიულ მოვალეობას ასრულებდა.

გარდაცვლილი ოპერატორის საქმეზე ალტერნატიულ ექსპერტიზას დამოუკიდებელი ექსპერტი, ალექსანდრე გეჯაძე ჩაატარებს.