სამედიცინო რეგულირების სააგენტომ ლექსო ლაშქარავას გარდაცვალების ფაქტის შესწავლა დაიწყო

„ნიუ ჰოსპიტალსში“, სადაც, 5 ივლისს მიღებული ძლიერი დაზიანებების შემდეგ, „ტვ პირველის“ ოპერატორი, ლექსო ლაშქარავა მკურნალობდა, აცხადებენ, რომ კლინიკაში ამ დროისთვის სამედიცინო რეგულირების სააგენტოს თანამშრომლები მუშაობენ და ისტორიას იკვლევენ.

„ამ წუთას, შემთხვევას სწავლობს რეგულირების სააგენტო, რომელთანაც ვთანამშრომლობთ, ვაანალიზებთ პროცესს. ჩვენი მხრიდან, არის სრული თანამშრომლობა, ვაძლევთ ყველა ინფორმაციას. გაწერა სტანდარტის მიხედვით მოხდა. ყველაფერი დანარჩენი არის თეორიები, რომლებზეც, მხოლოდ ექსპერტიზის შემდეგ შეიძლება მსჯელობა. რა თქმა უნდა, გაწერის წინ, ჩაუტარდა კომპიუტერული ტომოგრაფია. სააგენტოს წარმომადგენლები ჩვენთან არიან ახლა და ერთად გავდივართ ამ ისტორიას. ესაუბრებიან ყველას, ვისაც შეხება ჰქონდა ამ პაციენტთან, მათ შორის - მკურნალ ექიმსაც. დარწმუნებით შემიძლია გითხრათ, რომ პაციენტს ყველა საჭირო პროცედურა ჩაუტარდა“, - განაცხადა გიორგი რამიშვილმა.

ლექსო ლაშქარავას გარდაცვალების ფაქტზე, ვაკე-საბურთალოს პოლიციის სამმართველოში, გამოძიება საქართველოს სისხლის სამართლის კოდექსის 115 მუხლით დაიწყო. დაინიშნა სასამართლო-სამედიცინო ექსპერტიზა. გარდაცვლილის ცხედარი გადასვენებულია ექსპერტიზის ბიუროში.

ლექსო ლაშქარავა, რომელიც 5 ივლისის მოვლენების დროს დაშავდა, გამთენიისას, საკუთარ სახლში გარდაიცვალა. ოპერატორს „თბილისი პარაიდის“ მოწინააღმდეგეები, რადიკალურად განწყობილი ჯგუფები სასტიკად გაუსწორდნენ. ის პროფესიულ მოვალეობას ასრულებდა.

გარდაცვლილი ოპერატორის საქმეზე ალტერნატიულ ექსპერტიზას დამოუკიდებელი ექსპერტი, ალექსანდრე გეჯაძე ჩაატარებს.