როგორ ჩააბარეს აბიტურიენტებმა უცხოური ენების გამოცდა. NAEC-ის წარმომადგენლის განმარტება

შეფასებისა და გამოცდების ეროვნული ცენტრის უცხოური ენების ჯგუფის ხელმძღვანელი, რუსუდან ტყემალაძე პირველად შედეგებს აფასებს. მისი თქმით, სხვადასხვა ენასა და ვარიანტში, იმ აბიტურიენტების რაოდენობა, რომლებმაც მინიმალური კომპეტენციის ზღვარი გადალახეს, განსხვავდება.

„საშუალოდ ეს არის 91 -93%, რაც საკმაოდ კარგი მაჩვენებელია. თუმცა ისიც უნდა აღვნიშნოთ, რომ მინიმალური კომპეტენციის ზღვარი ჩვენს საგანში არის ძალიან დაბალი - მხოლოდ 20%. ტესტის სირთულის დონე თითქმის იგივეა, რაც იყო გასულ წლებში, მაგრამ შედეგები წელს უფრო მაღალია. 2021 წლის უცხოური ენების გამოცდაში 214-მა აბიტურიენტმა უმაღლესი ქულა მიიღო, მეორე მხრივ, დიდია ასევე იმ აბიტურიენტების რაოდენობაც, რომლებმაც საშუალოზე დაბალი ქულა მიიღეს, ან მხოლოდ მინიმალური კომპეტენციის ზღვარი გადალახეს“, - აღნიშნავს რუსუდან ტყემალაძე.

მისივე თქმით, შეცდომები ყველაზე კარგად გამოჩნდა ღია ტიპის ისეთ დავალებებში, როგორებიცაა თემა და წერილი.

„ეს დავალებები აბიტურიენტებისგან სხვადასხვა სახის ცოდნისა და ენობრივი უნარების ფლობას ითხოვს. მომავალმა აბიტურიენტებმა უნდა გაითვალისწინონ, რომ საკუთარი აზრი სწორად და ნათლად ჩამოაყალიბონ, რასაც მათგან დავალების პირობა ითხოვს. ხშირია შემთხვევები, როდესაც აბიტურიენტები მეტად განაზოგადებენ საკითხს, რის გამოც გამსწორებელს უჭირს გარკვევა, თუ კონკრეტულად რის შესახებ წერს აბიტურიენტი“, - აღნიშნავს NAEC-ის უცხოური ენების ჯგუფის ხელმძღვანელი.

მისივე თქმით, უცხოური ენის გამოცდიდან გრამატიკული დავალების ამოღებამ გაამართლა.

„არ არის საჭირო გრამატიკის ცოდნის იზოლირებულად შემოწმება მაშინ, როდესაც იმავეს წარმატებით ამოწმებს წერითი დავალებაც. წერის დავალების შეფასების სქემაში ცალკე გვაქვს გამოყოფილი გრამატიკული საკითხების ცოდნის შემოწმების კრიტერიუმი. ეს კი სრულად ცვლის ტესტიდან ამოღებულ იმ დავალებას, რომელიც გრამატიკის ცოდნას ამოწმებდა“, - აღნიშნავს რუსუდან ტყემალაძე.

შეფასებისა და გამოცდების ეროვნულმა ცენტრმა უცხოური ენების გამოცდის შედეგები გამოაქვეყნა. საკუთარი შედეგის გასაგებად აბიტურიენტი უნდა შევიდეს ამ ბმულზე და შესაბამის ველში პირადი ნომერი და ხუთნიშნა პაროლი მიუთითოს.

უცხოური ენების ტესტის მაქსიმალური ქულაა 80. აბიტურიენტს საგამოცდო საგანი ჩაბარებულად ჩაეთვლება, თუ ქულათა გათანაბრების შემდეგ მისი ქულა გახდება ამ საგნისთვის განსაზღვრული მაქსიმალური ქულის 20%-ზე მეტი (16 ქულაზე მეტი).