კახა კალაძე: ძალიან ბევრი პროექტის დროებით შეჩერებამ მოგვიწია, მაგრამ ამასაც გავაკეთებთ და ამაზე მეტსაც იმისთვის, რომ ჩვენი ქალაქი იყოს ყველაზე მოწესრიგებული

ძალიან ბევრი პროექტის დროებით შეჩერებამ მოგვიწია, რომელზეც ვამბობდი, რომ აუცილებლად განვახორციელებდით ამ 4 წლის განმავლობაში. ასეთი იყო ვაჟა-ფშაველას გამზირის რეაბილიტაცია, წერეთელი, ქეთევან დედოფლის გამზირი, ასევე ბაგებისა და უნივერსიტეტის ქუჩის დამაკავშირებელი ხიდის მშენებლობა. აგრეთვე მთაწმინდისა და რუსთაველის დამაკავშირებელი ისტორული საბაგიროს მშენებლობა- ამის შესახებ თბილისის მერმა, კახა კალაძემ იმედის გადაცემაში „პირისპირ“ განაცხადა.

მისივე განმარტებით, ამ ყველაფერს თავისი ახსნაც აქვს.

„აბსოლუტურად გულწრფელად ვამბობ, რომ ამ პანდემიის პირობებში, 2 წელი ფაქტობრივად გაჩერებულები ვიყავით და ვერაფერს ვაკეთებდით, რადგან თანხები, რომელიც მობილიზებული გვქონდა ინფრასტრუქტურულ პროექტებზე, გადმისამარათებული იყო იმ ოჯახების და იმ ოჯახების მხარდასაჭერად, ვისაც ყველაზე მეტად გაუჭირდა პანდემიის დროს და სამსახურისა და ხელფასის გარეშე დარჩნენ. თუმცა ეს არ ნიშნავს იმას, რომ ეს პროექტები არ განხორციელდება. ამასაც გავაკეთებთ და ამაზე მეტსაც იმისთვის, რომ ჩვენი ქალაქი იყოს ყველაზე მოწესრიგებული, იყოს გამართული ინფრასტრუქტურა, გამართული საზოგადოებრივი ტრანსპორტი და იყოს ყველაზე მწვანე ქალაქი ევროპაში“, - განაცხადა კახა კალაძემ.

თბილისის მერმა ჭავჭავაძის გამზირის რეაბილიტაციაზეც ისაუბრა. მისივე თქმით, ქალაქს ამ პროექტის სარგებელი ჯერ კიდევ ბოლომდე არ მიუღია.

„ეს ხომ არ არის მარტო 1 კონკრეტული პროექტი, ამას სჭირდება გაგრძელება. ეს საერთო ჯამში მოგცემს რეალურად იმის შესაძლებლობას, რომ სატრანსპორტო კოლაფსი განვუხტოთ. ამას ემატება ჭკვიანი შუქნიშნები. ეს ჩვენი სატრანსპორტო რეფორმა მხოლოდ ავტობუსების ჩანაცვლებით კი არ შემოიფარგლება და მხოლოდ ლამაზი ავტობუსების შემოყვანა კი არ არის ამ პროგრამის შინაარსი. ბევრი მნიშვნელოვანი კომპონენტისგან შედგება, რაც საერთო ჯამში იმის საშუალება, რომ ქალაქში ყველას ჰქონდეს თავისუფლად გადაადგილების საშუალება. ასევე ერთ-ერთი პრიორიტეტული გახდა ეკომეგობრული ტრანსპორტი - ეს არის სკუტერები, მოტოციკლები, ველოდისიპედები და ასევე საზოგადოებრივი ტრანსპორტი, რომელიც რეფორმის შედეგად უნდა იყოს ყველაზე სწრაფი და რა თქმა უნდა, ძალიან ბევრმა ადამიანმა უნდა მოიხმაროს“, - განაცხადა კახა კალაძემ.