კახა კალაძე: ვერ ნახავთ ვერცერთ ფაქტს, რომ უკანონო მშენებლობაზე ჩვენი მხრიდან რეაგირება არ ყოფილიყო - ეს დედაქალაქში სერიოზული გამოწვევა და პრობლემაა

ვერ ნახავთ ვერცერთ ფაქტს, რომ ჩვენი მხრიდან უკანონო მშენებლობაზე არ ყოფილიყო რეაგირება. ეს არის სერიოზული გამოწვევა და პრობლემა დედაქალაქში, - ამის შესახებ დედაქალაქის მერმა, კახა კალაძემ „შაბათის ქრონიკაში“ განაცხადა.

„2017 წელს, როდესაც ჩვენ ხელისუფლებაში მოვედით, ამ პრობლემას [უკანონო მშენებლობა] წავაწყდით. ჯარიმა იყო ძალიან ცოტა - 3 ათასიდან 12 ათასამდე. ადამიანები, რომლებიც კორპუსებს აშენებდნენ მათთვის ამ თანხის გადახდა საერთოდ არაფერს წარმოადგენდა და ძალიან ბევრი მშენებლობა მიმდინარეობდა კანონდარღვევით. ამის შემდეგ ჩვენ ჯარიმები გავაათმაგეთ, მაგრამ ესეც არ გახდა საკმარისი იმისთვის, რომ უკანონო მშენებლობები შეგვეჩერებინა. ამისთვის მივიღეთ გადაწყვეტილება - თუ გაფრთხილებას არ დაექვემდებარება კონკრეტული მშენებელი ის გადის სისხლის სამართლის დანაშაულზე. ეს არის მნიშვნელოვანი და ვფიქრობ, ერთადერთი შესაძლებლობა რითაც უკანონო მშენებლობების შეჩერებას შევძლებთ“, - განაცხადა კახა კალაძემ.