სუსი: 2021 წელს, ქვეყანაში არ დაფიქსირებულა რადიკალური/ექსტრემისტული კერები, საქართველოში ტერორიზმის შესაძლო მხარდამჭერთა რაოდენობა მნიშვნელოვნადაა შემცირებული

სახელმწიფო უსაფრთხოების სამსახურის მიერ გაწეული ძალისხმევის შედეგად, ქვეყანაში არ დაფიქსირებულა რადიკალური/ექსტრემისტული კერები. საქართველოში ტერორიზმის შესაძლო მხარდამჭერთა რაოდენობა მნიშვნელოვნადაა შემცირებული, - ამის შესახებ აღნიშნულია სახელმწიფო უსაფრთხოების სამსახურის 2021 წლის ანგარიშში, რომელიც პარლამენტს განსახილველად წარედგინა.

„ტერორისტული ორგანიზაციების მხარდამჭერებისთვის საქართველოს ტერიტორიაზე მოქმედება არახელსაყრელი იყო. ტერორიზმთან დაკავშირებული აქტივობების განხორციელებისთვის ხელის შეშლის მიზნით, სახელმწიფო უსაფრთხოების სამსახურისა და სხვა რელევანტური უწყებების მხრიდან ქვეყანაში კოორდინირებული ღონისძიებების გატარება კვლავ გრძელდებოდა. აღნიშნული ზომების მიღების შედეგად, ტერორიზთან დაკავშირებული პირებისთვის სირთულეს წარმოადგენდა საქართველოში პოტენციური მხარდამჭერების შეძენა, ასევე, ტერორისტული აქტივობების დაფინანსება. აღნიშნულის მიუხედავად, ტერორისტული თავდასხმის განხორციელების შესაძლებლობის სრულად გამორიცხვა შეუძლებელია. სახელმწიფო უსაფრთხოების სამსახურის მიერ გაწეული ძალისხმევის შედეგად, ქვეყანაში არ დაფიქსირებულა რადიკალური/ექსტრემისტული კერები. საქართველოში ტერორიზმის შესაძლო მხარდამჭერთა რაოდენობა მნიშვნელოვნადაა შემცირებული. საანგარიშო პერიოდში მათ კვლავ არ ეძლეოდათ ტერორისტული აქტივობების ორგანიზებისა და განხორციელების საშუალება“, - ნათქვამია ინფორმაციაში.

როგორც სუს-ის ანგარიშში ვკითხულობთ, 2021 წელს საქართველოში ტერორისტულ თავდასხმას ადგილი არ ჰქონია. საანგარიშო პერიოდში სახელმწიფო უსაფრთხოების სამსახურმა გამოძიება დაიწყო ტერორისტული აქტის ჩადენის მუქარის ორ ფაქტზე, ასევე საერთაშორისო დაცვით მოსარგებლე უცხო ქვეყნის წარმომადგენელზე თავდასხმის მუქარის შემთხვევაზე. საგამოძიებო მოქმედებები კვლავ მიმდინარეობს.

ანგარიშში საუბარია სირია-ერაყის ტერიტორიაზე მყოფი, „დაეშის“ და „ალ-კაიდას“ რიგებში მებრძოლი საქართველოს მოქალაქეების ქვეყანაში შესაძლო შემოსვლაზე.

„სირია-ერაყის ტერიტორიაზე მყოფი, ტერორისტული ორგანიზაციის წევრების ან შესაძლო მხარდამჭერებისა და მათი ოჯახის წევრების წარმოშობის ქვეყნებში დაბრუნება მრავალი სახელმწიფოსთვის კვლავ მნიშვნელოვან პრობლემას წარმოადგენს. აღნიშნული მიმართულებით გამონაკლისი არც საქართველოა. სირიის არაბთა რესპუბლიკაში ამ ეტაპზე, სავარაუდოდ, იმყოფებიან ტერორისტული ორგანიზაციების რიგებში სხვადასხვა დროს მებრძოლი საქართველოს 15 მოქალაქე და მათი ოჯახის წევრები.

საანგარიშო პერიოდში სირიასა და ერაყში მყოფ, ტერორისტული ორგანიზაციების საქმიანობაში ჩართულ, საბრძოლო მოქმედებებში სხვადასხვა დროს შესაძლო მონაწილე საქართველოს მოქალაქეებსა და მათი ოჯახის წევრებთან დაკავშირებით, გრძელდებოდა შესაბამისი საგამოძიებო და ოპერატიული ღონისძიებები. საქართველოში მათი დაბრუნების შემთხვევაში, სახელმწიფო უსაფრთხოების სამსახური კანონმდებლობით გათვალისწინებულ სათანადო ზომებს მიმართავს. აღსანიშნავია, რომ ტერორისტი მებრძოლების ოჯახის წევრთა მიმართ, რომელთა ქმედებები დანაშაულის ნიშნებს არ შეიცავს, სახელმწიფო საუკეთესო საერთაშორისო პრაქტიკით იხელმძღვანელებს“, - წერია სუსის ინფორმაციაში.

დოკუმენტში ვკითხულობთ, უცხოელი ტერორისტი მებრძოლების, ტერორიზმთან დაკავშირებული პირების მიერ საქართველოში შესაძლო შემოსვლის, მათ შორის, ქვეყნის ტერიტორიის სატრანზიტო მიზნით გამოყენების მცდელობის თაობაზეც.

„საქართველოსთვის კვლავ გამოწვევად რჩება ახლო აღმოსავლეთის რეგიონში მყოფი უცხოელი ტერორისტი მებრძოლების ან ტერორიზმთან ნებისმიერი ფორმით დაკავშირებული პირების მიერ სახელმწიფო საზღვრის გადმოკვეთის შესაძლო მცდელობა, ასევე მათ მიერ, კონკრეტულ ქვეყანაში მოხვედრის მიზნით, სატრანზიტო მარშრუტის ნაწილად საქართველოს ტერიტორიის შესაძლო გამოყენება. საანგარიშო პერიოდში გრძელდებოდა საქართველოს საზღვრების კონტრტერორისტული სკრინინგი, მკაცრ კონტროლს ექვემდებარებოდა ქვეყანაში არალეგალურად მოსახვედრი გზები და ე.წ. დერეფნები. აღნიშნული მიმართულებით, საქართველო განაგრძობდა ტერორიზმის წინააღმდეგ ბრძოლის ფარგლებში ნაკისრი საერთაშორისო ვალდებულებების შესრულებას“, - აცხადებენ უწყებაში.

ამასთან, სახელმწიფო უსაფრთხოების სამსახურის ინფორმაციით, უწყება საერთაშორისო ტერორისტული ორგანიზაციების დაფინანსების ან მათთვის ნებისმიერი ფორმით დახმარების გაწევისთვის ხელშეშლის მიზნით, შესაბამის ოპერატიულ და საგამოძიებო ღონისძიებებს ახორციელებდა. მათ შორის, მუდმივი დაკვირვება ხორციელდებოდა ტერორიზმთან სავარაუდოდ დაკავშირებულ სხვადასხვა ოპერაციებსა და ტრანზაქციებზე.

„სახელმწიფო უსაფრთხოების სამსახურისა და შესაბამისი უწყებების ძალისხმევის, ასევე, საერთაშორისო პარტნიორებთან კოორდინაციის შედეგად, საანგარიშო პერიოდში საქართველოს ტერიტორიაზე ტერორიზმის დაფინანსების ან სხვაგვარი დახმარების ფაქტებს ადგილი არ ჰქონია“.