ირაკლი რუხაძე: დამოუკიდებელი ტელევიზიის როლი ქვეყნის ნორმალურ განვითარებაში იმდენად მნიშვნელოვანია, რომ როცა ჩვენმა ქვეყანამ გადაუხვია ამ გზიდან, ერთ-ერთი მთავარი, რაც ყელში გაეჩხირათ, იყო „იმედი“

დამოუკიდებელი ტელევიზიის როლი ქვეყნის ნორმალურ განვითარებაში იმდენად მნიშვნელოვანია, რომ როცა ჩვენმა ქვეყანამ გადაუხვია ამ ნორმალური გზიდან, 2005 წლიდან დაიწყო ალბათ ეს ყველაფერი, ერთ-ერთი მთავარი, რაც ყელში გაეჩხირათ, იყო „იმედი“, - ამის შესახებ ტელეკომპანია „იმედის“ მფლობელმა, ირაკლი რუხაძემ განაცხადა.

მისივე თქმით, „იმედის“ სულისჩამდგმელი იყო ბადრი პატარკაციშვილი, რომელსაც მიაჩნდა, რომ ქვეყნის განვითარებისთვის ძალიან მნიშვნელოვანი იყო, რომ ყოფილიყო დამოუკიდებელი არხი.

„ეს იყო მისთვის მთავარი. სულ ჩართული ჰქონდა, სულ უყურებდა და იცოდა, რამხელა მისია დაიკისრა მან იმით, რომ „იმედი“ დააარსა. მე ძალიან ბედნიერი ვარ, რომ დაარსების დღიდან ამ კომპანიის გარშემო ვარ. დამოუკიდებელი ტელევიზიის როლი ქვეყნის ნორმალურ განვითარებაში იმდენად მნიშვნელოვანია, რომ როცა ჩვენმა ქვეყანამ გადაუხვია ამ ნორმალური გზიდან, 2005 წლიდან დაიწყო ალბათ ეს ყველაფერი, ერთ-ერთი მთავარი, რაც ყელში გაეჩხირათ, იყო „იმედი“. აუცილებელი გახდა „იმედის“ დახურვა, მიტაცება, დანგრევა, რათა გაეგრძელებინათ ეს მახინჯი გზა, რომლითაც მერე 2012 წლამდე იარეს. ეს 20 წელი იყო მხოლოდ აღმავალი, გარდა იმ რამდენიმე წლისა, როცა ჩვენ უბრალოდ „იმედი“ არ გვქონდა. მადლობა მინდა გადავუხადო ჩვენს მაყურებელს, იმიტომ რომ მაყურებლის გარეშე ტელევიზია არ არსებობს. იმ ხალხს მინდა გადავუხადო, ვინც „იმედს“ უყურებს. ისინი გვაძლევენ იმ შემართებას, რომ გავაგრძელოთ იმის კეთება, რასაც ვაკეთებთ, და მოვიტანოთ მაღალი ხარისხის, მაღალი პროფესიონალიზმით გაკეთებული გადაცემები, იქნება ეს ახალი ამბები თუ გასართობი, ამას თქვენ ფანტასტიკურად აკეთებთ“, - აცხადებს ტელეკომპანია „იმედის“ მფლობელი ირაკლი რუხაძე.

2023 წელს ტელეკომპანია „იმედისთვის“ განსაკუთრებული მნიშვნელობა აქვს. „ტელეიმედი“ 20 წლის ხდება. ტელეკომპანია, რომელიც ქართულ მედია ბაზარზე ურყევი ლიდერია, არაერთი საინტერესო პროექტის ავტორია, რომელიც მაყურებელს არაერთ საინტერესო სანახაობას სთავაზობს. „იმედის“ დაბადების იდეა ბადრი პატარკაციშვილს ეკუთვნის. არხის 20-წლიანი ისტორიის განმავლობაში იყო ბრძოლა გადარჩენისთვის. ის, რომ არხი დღეს ეთერშია და მაუწყებლობს, ამაში დიდი წვლილი მაყურებელს მიუძღვის.