ნინო წილოსანი: თითოეული ჩვენი მოქალაქის ცნობიერებამდე უნდა მივიყვანოთ, რომ სახელმწიფო ქმნის ყველა მექანიზმს, რათა მათი ქალიშვილები, დები, დედები იყვნენ რეალიზებულები

ნინო წილოსანმა გადაცემაში „იმედი LIVE“ ქალთა მიმართ ძალადობის საწინააღმდეგო „ნარინჯისფერი კამპანია“ განიხილა. პარლამენტის გენდერული საბჭოს თავმჯდომარემ და „ქართული ოცნების“ ქალთა ორგანიზაციის გამგეობის ხელმძღვანელმა ამ მიმართულებით სახელმწიფო პოლიტიკის ცვლილებებზეც ისაუბრა და აღნიშნა, რომ საქართველოს კანონმდებლობა ნამდვილად ერთ-ერთი პროგრესულია.

წილოსანმა ასევე ძალადობის მსხვერპლ იმ ქალებს მიმართა, რომლებიც ამაზე საუბარს არ აპირებენ.

„რაც ერთმნიშვნელოვნად შეგვიძლია ვთქვათ, სახელმწიფო მათ გვერდით არის, დაწყებული სამართალდამცველების რეაგირებით, გაგრძელებული იმ სერვისებით, რომლებიც კრიზისულ ცენტრებში, თავშესაფრებში, შემდეგ მუნიციპალური პროგრამების სახით მათ მხარდაჭერად [არსებობს], ქირით უზრუნველყოფა, ფინანსური დახმარება და ასევე თითოეული ჩვენგანის სოლიდარობა. რა თქმა უნდა, საზოგადოების მზაობა მნიშვნელოვანია“, - განაცხადა წილოსანმა.

დეპუტატმა ასევე 18-წლამდე ქორწინებაზე საზოგადოებაში არსებულ მოსაზრებებზე ისაუბრა.

„ვიყავით რეგიონებში, სადაც გვეუბნებოდნენ, რომ ეს კეთდებოდა გოგონების უკეთესი მომავლისთვის, რომ „პატრონს უნდა ჩააბარონ“. ჩვენ ვუხსნიდით, რომ განვითარებულ სახელმწიფოში, საქართველოში, მათ შვილებს აქვთ ყველანაირი შესაძლებლობა ისწავლონ, მიიღონ განათლება, დაიწყონ მუშაობა, შემდეგ დაოჯახდნენ და თვითონ იყვნენ წარმატებულები და არ იყვნენ ვიღაცის კუთვნილება ან ვიღაცის ობიექტი და ვიღაცისთვის გადასაბარებელი საგანი. ვფიქრობ, თაობები ამ ყველაფერს გამოასწორებენ, მაგრამ ჩვენ არ უნდა ველოდოთ თაობებს. ამ დროს, ამ წუთას, თითოეული ჩვენი მოქალაქის ცნობიერებამდე უნდა მივიყვანოთ, რომ ქვეყანა და სახელმწიფო ქმნის ყველა მექანიზმს, რათა მათი გოგოები, შვილები, დები, დედები იყვნენ რეალიზებულები და ამის უსაფრთხო გარემო იყოს“, - აღნიშნა წილოსანმა.