ლაშა გეგეჭკორი: „ორკესტრირებული“ პროტესტი მიმდინარეობდა სოციალურ ქსელ „ფეისბუქშიც“. პროტესტს მართავდა რამდენიმე ადამიანი, მათ არ აწყობთ მიუსაფარ ცხოველთა რაოდენობის ჰუმანური გზით შემცირება, რადგან ეს ურტყამს მათ ფინანსურ მოგებას

მიუსაფარ ცხოველთა (ძაღლი, კატა) პოპულაციის მართვის პროგრამა უნდა გაგრძელდეს უფრო დიდი მასშტაბით, - აღნიშნულია მიუსაფარ ცხოველთა პოპულაციის მართვის, კახეთის და შიდა ქართლის სააგენტოების კონცეპტუალური პროექტის თანაავტორის ლაშა გეგეჭკორის მიერ გავრცელებულ განცხადებაში.

მისივე თქმით, ერთ-ერთ პრობლემას წარმოადგენს ქვეყანაში მიუსაფარ ცხოველთა (ძაღლი, კატა) ჰიპერპოპულაცია. იგი მიიჩნევს, რომ ზემოთ აღნიშნულის გარდა, პრობლემის მართვის მიზნით, რეგიონებში უნდა აშენდეს პოპულაციის მართვის ცენტრები.

„ხელისუფლების ვალდებულებაა, უპასუხოს ქვეყანაში არსებულ ყველა გამოწვევას.

ერთ-ერთ ასეთ პრობლემას წარმოადგენს ქვეყანაში მიუსაფარ ცხოველთა (ძაღლი, კატა) ჰიპერპოპულაცია.

მიუსაფარ ცხოველთა წარმოუდგენლად დიდი რაოდენობის ძირითადი მიზეზებია, მომშენებლების მიერ მათი უკონტროლო გამრავლება, პატრონების მიერ ცხოველთა გარემოში გაშვება და რამდენიმე რეგიონში პოპულაციის მართვის ცენტრების არარსებობა.

2021 წლიდან კახეთში და შიდა ქართლში ოპერირებს მიუსაფარ ცხოველთა პოპულაციის მართვის ცენტრები, რომლებიც ჰუმანური გზით, სტერილიზაცია-კასტრაციის ოპერაციების მეთოდით მართავენ მათ რაოდენობას, ამცირებენ მათ უკონტროლო გამრავლებას. ორივე სააგენტომ 2025 წელს ჯამში გააკეთა ამ სახის 7 000-მდე ოპერაცია.

2015 წლიდან კი თბილისში ფუნქციონირებს ცხოველთა მონიტორინგის სააგენტო, რომელმაც მხოლოდ 2025 წელს 12 000-მდე ოპერაცია გააკეთა.

2025 წელს, სურსათის ეროვნულმა სააგენტომ, საქართველოს მთავრობის 2025 წლის 16 ივნისის N 1019 განკარგულებით დამტკიცებული საპილოტე პროგრამის შესაბამისად ბორჯომის მუნიციპალიტეტში, კახეთის, იმერეთის რეგიონებში და აჭარის ა/რ მასშტაბით ჩაატარა 10 000-მდე მიუსაფარი ცხოველის ცოფზე აცრა-სტერილიზაცია/კასტრაციის ოპერაცია-რეგისტრაციის სამუშაოები.

სააგენტოს მიერ ჩატარებული საპილოტე პროგრამა ხელს უწყობს მიუსაფარი ცხოველების პოპულაციის მართვას. მნიშვნელოვანია მათ ჯანმრთელობაზე ზედამხედველობა და ანტირაბიული (ცოფზე) აცრა. ეს ყველაფერი კი ხელს უწყობს ადამიანის და ცხოველის ჰარმონიულ თანაცხოვრებას.

სააგენტომ აღნიშნული სამუშაოები ჩაატარა შესრულებული 15 000 სახელმწიფო კონტროლის და შინაური ცხოველების 300 000 ცოფზე აცრის პარალელურად, რაც უდავოდ წარმატებულ მუშაობად უნდა ჩაითვალოს.

დამატებით ავღნიშნავ, რომ სურსათის ეროვნული სააგენტოს მიერ საპილოტე პროგრამის მართვა მიმდინარეობდა ზოგიერთი ცხოველთადამცველის უსაფუძვლო პროტესტის ფონზე. იწერებოდა საჩივრები, თუმცა ავტორებმა ვერ მოიყვანეს ან/და დაამტკიცეს ვერც ერთი ფაქტი, რომელიც დაადასტურებდა სააგენტოს გადაცდომას, ან ჩადენილ დანაშაულს.

მიზანმიმართული, ხელოვნურად „ორკესტრირებული“ პროტესტი მიმდინარეობდა სოციალურ ქსელ „ფეისბუქშიც“. პროტესტს მართავდა რამდენიმე ადამიანი, რომელთა ინტერესი ამ სფეროში არის მხოლოდ ფინანსური სახის. მათ არ აწყობთ მიუსაფარ ცხოველთა რაოდენობის ჰუმანური გზით შემცირება, რადგან ეს პირდაპირ ურტყამს მათ ფინანსურ მოგებას, რომელსაც იღებენ/იღებდნენ შესაბამისი ტენდერებით.

ასევე, ეს ადამიანები ხშირად აქვეყნებენ მიუსაფარი ცხოველების ფოტოებს, საბანკო ანგარიშებს, ქმნიან ფონდებს და არა მარტო ქვეყნის შიგნით, არამედ ემიგრანტებისგანაც ახდენენ შემოწირულობების მიღებას. შემდგომ კი ამა თუ იმ ასეთი ცხოველის ბედი გაურკვეველი ხდება.

ალბათ, ყველა დამეთანხმებით, რომ მიუსაფარი შინაური ცხოველი (ძაღლი, კატა) არ უნდა ცხოვრობდეს ქუჩაში.

მსოფლიო პრაქტიკაში არსებობს ცხოველთა პოპულაციის ჰუმანური მართვის მხოლოდ ერთი მეთოდი: სტერილიზაცია-კასტრაციის ოპერაციებით მათი გამრავლების უნარის დაკარგვა.

ვინც ამ მეთოდს ეწინააღმდეგება, ის არ წარმოადგენს ცხოველთამოყვარულს და მათი უფლებების დამცველს. პირიქით, ის არის ამ უმწეო არსებების მტერი და მათში მხოლოდ სარგებელს ეძებს.

1. მიუსაფარ ცხოველთა (ძაღლი, კატა) პოპულაციის მართვის პროგრამა უნდა გაგრძელდეს უფრო დიდი მასშტაბით.

2. დანარჩენ რეგიონებში უნდა აშენდეს პოპულაციის მართვის ცენტრები“, - აღნიშნულია ლაშა გეგეჭკორის მიერ გავრცელებულ განცხადებაში.