თბილისის მერმა ყველა შესაბამისი სამსახურის წარმომადგენელს დაავალა, სახანძრო უსაფრთხოების მიმართულებით არსებული რეგულაციები გამკაცრდეს და ექსპლუატაციაში მიღებული შენობები შემოწმდეს

დედაქალაქის მერის კახა კალაძის განცხადებით, მიუხედავად იმისა, რომ ბოლო წლებში შენობა-ნაგებობების უსაფრთხოების კუთხით კანონმდებლობა გამკაცრდა და ამოქმედდა არაერთი რეგულაცია, სახანძრო უსაფრთხოების მიმართულებით, დარღვევები კვლავ ფიქსირდება.

როგორც მან თბილისის მუნიციპალიტეტის მთავრობის სხდომაზე განმარტა, შენობის ექსპლუატაციაში მიღების შემდეგ, ზოგიერთი სამშენებლო კომპანია სახანძრო უსაფრთხოების სისტემის დემონტაჟს ახდენს, რაც მუნიციპალიტეტისთვის კატეგორიულად მიუღებელია.

კახა კალაძის თქმით, მოქალაქეთა უსაფრთხოება მუნიციპალიტეტისთვის უმნიშვნელოვანესია და უსაფრთხოების წესები ყველა მშენებელმა უნდა დაიცვას.

„2017 წლიდან, რაც ხელისუფლებაში მივედით, აქტიურად ვებრძვით უკანონო მშენებლობებს. გახსოვთ, რა მდგომარეობა იყო მაშინ და ახლა სულ სხვა სურათია, თუმცა კვლავაც გვაქვს გამოწვევები, რასაც ღირსეული პასუხი სჭირდება. მთელი ამ დროის განმავლობაში ვხვეწთ მშენებლობის ნებართვის გაცემისა და აღსრულების წესებს, ვითხოვთ სხვადასხვა კომპონენტის გათვალისწინებას. შევიმუშავეთ რეგულაციები და გავამკაცრეთ კანონები. ჩვენთვის ყველაზე მთავარია, მოქალაქეთა უსაფრთხო და კომფორტული ცხოვრება იყოს უზრუნველყოფილი, მას შემდეგ, რაც შენობა ექსპლუატაციაში შევა. 2017 წელს, სხვა ცვლილებებთან ერთად, ამოქმედდა შენობა-ნაგებობის უსაფრთხოების წესები. ამოქმედების დღიდან, თბილისის არქიტექტურის სამსახური მშენებლობის ნებართვის გაცემის დროს სკრუპულოზურად ამოწმებს წარდგენილი საპროექტო დოკუმენტაციის შესაბამისობას უსაფრთხოების წესებთან, ადგენს ხარვეზებს, მათ შორის სახანძრო უსაფრთხოების აქტიური სისტემების საჭიროების შესახებ და არ გასცემს ნებართვას იმ შემთხვევაში, თუ აღნიშნული ხარვეზები არ სწორდება“, - აღნიშნა კახა კალაძემ.

მისივე განმარტებით, თბილისის მუნიციპალური ინსპექცია დასრულებულ შენობა-ნაგებობას ექსპლუატაციაში იღებს იმ შემთხვევაში, თუ მშენებლობა განხორციელებულია არქიტექტურის სამსახურის მიერ შეთანხმებული პროექტის შესაბამისად, მათ შორის, თუ მოწყობილია სახანძრო უსაფრთხოების აქტიური სისტემები და მათ გამართულ მუშაობაზე გამოცდის აქტები და დადებითი დასკვნებია წარმოდგენილი.

ამასთან, დედაქალაქის მერის ინფორმაციით, მიუხედავად იმისა, რომ სახანძრო უსაფრთხოების მიმართულებით კანონმდებლობა გამკაცრდა, შენობის ექსპლუატაციაში მიღების შემდეგ, ზოგიერთი სამშენებლო კომპანია სახანძრო უსაფრთხოების სისტემის დემონტაჟს აკეთებს.

„ხანძრის გაჩენის შემთხვევაში, სახანძრო უსაფრთხოების სისტემა ატყობინებს შენობაში მყოფებს, დატოვონ შენობა, ასევე, ახდენს მის ლოკალიზებას და ხელს უშლის მის გავრცელებას, რაც მნიშვნელოვან დროს აძლევს სახანძრო-სამაშველო სამსახურს ცეცხლის ქრობისთვის. მიუხედავად ამისა, დაფიქსირდა სამწუხარო შემთხვევები, როდესაც შენობის ექსპლუატაციაში მიღების შემდეგ მოხდა აღნიშნული სისტემების დემონტაჟი. არიან უპასუხისმგებლო კომპანიები და მშენებლები, რომლებიც ე.წ. აგრეგატებსა და გამწოვ სისტემებს ხსნიან. ექსპლუატაციაში მიღებისთვის ისინი ქირაობენ ამ სისტემას. მივა მუნიციპალური ინსპექცია, შეამოწმებს, რომ ყველაფერი მწყობრშია და კორპუსს მიიღებს ექსპლუატაციაში. შემდეგ მშენებლები ხსნიან ამ სისტემას და პატრონს უბრუნებენ, მოსახლეობა კი საფრთხის ქვეშ ცხოვრობს. ჩვენთვის მსგავსი დამოკიდებულება წარმოუდგენელია და ამას არ გავატარებთ. უსაფრთხოების წესები ყველამ უნდა დაიცვას. ღმერთმა დაგვიფაროს და რამე რომ მოხდეს, ყველა თბილისის მერიას დაადანაშაულებს“, - განაცხადა კახა კალაძემ.

დედაქალაქის მერმა ვიცე-მერს და ყველა შესაბამის სამსახურს დაავალა, აღნიშნული მიმართულებით არსებული რეგულაციები გამკაცრდეს და საჭიროების შემთხვევაში, დადგეს კანონდამრღვევი პირის სისხლისსამართლებრივი პასუხისმგებლობა.

„მინდა, დავავალო ვიცე-მერს გიორგი ტყემალაძეს, რომ შესაბამის სამსახურებთან ერთად კატეგორიული ზომები მივიღოთ. თუ საკანონმდებლო ცვლილებებია საჭირო, პარლამენტი დაგვეხმარება. თუ საჭიროა, რომ ასეთი ქმედება სისხლის სამართლის დონეზე ავიყვანოთ, მაშინ მივიღოთ ასეთი გადაწყვეტილება, რადგან პირადად ჩემთვის ადამიანის უსაფრთხოება უმნიშვნელოვანესია. თუ იკვეთებიან კონკრეტული თაღლითური კომპანიები ან ფიზიკური პირები, ასეთ ადამიანებს სამშენებლო სექტორში არაფერი ესაქმებათ“, - განაცხადა კახა კალაძემ

დედაქალაქის მერმა თბილისის მუნიციპალურ ინსპექციას დაავალა, რომ სასწრაფოდ დაიწყოს მოკვლევა და ექსპლუატაციაში მიღებული შენობების სახანძრო უსაფრთხოების სისტემები შემოწმდეს.