დავით სონღულაშვილმა და თურქეთის სოფლისა და სატყეო მეურნეობის მინისტრმა სამელიორაციო ინფრასტრუქტურის მოწყობის და სატყეო მეურნეობის მართვის კუთხით თანამშრომლობის მიმართულებებით საქართველო-თურქეთს შორის თანამშრომლობის მემორანდუმებს მოაწერეს ხელი

საქართველოს გარემოს დაცვისა და სოფლის მეურნეობის მინისტრი დავით სონღულაშვილი სამუშაო ვიზიტით თურქეთის რესპუბლიკაში იმყოფება. ვიზიტის ფარგლებში, დავით სონღულაშვილი თურქეთის რესპუბლიკის სოფლისა და სატყეო მეურნეობის მინისტრს იბრაჰიმ იუმაკლს შეხვდა.

მხარეებმა საქართველო-თურქეთს შორის სამელიორაციო ინფრასტრუქტურის მოწყობის და სატყეო მეურნეობის მართვის კუთხით თანამშრომლობის მემორანდუმებს მოაწერეს ხელი.

ირიგაციისა და დრენაჟის მართვისა და სამელიორაციო ინფრასტრუქტურის სფეროში თანამშრომლობის შესახებ ურთიერთგაგების მემორანდუმის ფარგლებში, მხარეები ითანამშრომლებენ ცოდნის, გამოცდილების და ტექნოლოგიების გაზიარების კითხით, რაც მიზნად ისახავს სამელიორაციო ინფრასტრუქტურის გაუმჯობესებას უკეთესი საირიგაციო და სადრენაჟე მომსახურების მიწოდების უზრუნველსაყოფად.

სატყეო სფეროში თანამშრომლობის შესახებ ურთიერთგაგების მემორანდუმის ძირითადი მიზანია ორ ქვეყანას შორის სატყეო სფეროში თანამშრომლობის გაღრმავება. ქვეყნები ითანამშრომლებენ ისეთი მიმართულებებით, როგორებიცაა სატყეო მართვის მდგრადი პრაქტიკები, ნერგების გამოყვანის ტექნოლოგიები, ბიომრავალფეროვნების დაცვა და დაცული ტერიტორიების მართვა, გაუდაბნოებასთან და ეროზიასთან ბრძოლა, ტყის არამერქნული პროდუქტების ინვენტარიზაცია, ეკოტურიზმი, ტყეების კადასტრი.

„ორ ქვეყანას შორის სულ უფრო იზრდება და ძლიერდება თანამშრომლობა. განსაკუთრებით აღსანიშნავია მემორანდუმები რომელიც გაფორმდა თურქულ მხარესთან. მნიშვნელოვანია გამოცდილება, რომელიც თურქეთს გააჩნია და თავისთავად ცხადია, მნიშვნელოვანია ამ გამოცდილების გაზიარება“, - განაცხადა დავით სონღულაშვილმა.
თურქეთის რესპუბლიკის სოფლისა და სატყეო მეურნეობის მინისტრს იბრაჰიმ იუმაკლის განცხადებით, საქართველოსთან თანამშრომლობა დღითიდღე იზრდება.

„ჩვენ უფრო მეტად ვაძლიერებთ თანამშრომლობას მემცენარეობის, მავნებლების წინააღმდეგ ბრძოლის, ირიგაციისა და მასთან დაკავშირებული საკითხების კუთხით. ორი ურთიერთთანამშრომლობის მემორანდუმი გავაფორმეთ. ერთი მემორანდუმი წყლის, ირიგაციისა და დრენაჟის სფეროში ტექნიკური თანამშრომლობის საკითხებს ეხება, ხოლო მეორე - სატყეო სფეროში ჩვენი თანამშრომლობის გაძლიერებას. იმედი მაქვს, ორივე ურთიერთთანამშრომლობის მემორანდუმი წარმატების მომტანი იქნება. კიდევ ერთხელ მინდა მადლობა გადავუხადო მინისტრს ჩვენს ფორუმსა და მაღალი დონის მინისტერიალში მონაწილეობისთვის“, - განაცხადა თურქეთის რესპუბლიკის სოფლისა და სატყეო მეურნეობის მინისტრმა იბრაჰიმ იუმაკლიმ.
თურქეთის რესპუბლიკაში ვიზიტის ფარგლებში, საქართველოს გარემოს დაცვისა და სოფლის მეურნეობის მინისტრი დავით სონღულაშვილი მინისტერიალს „მოსავლის აღების შემდგომი დანაკარგების შემცირება: სურსათის მიწოდების ჯაჭვში ეფექტიანობის გაზრდა“ დაესწრება.