მეუფე თეოდორე აწყურის ტაძარზე: რამდენიმე ბიზნესმენმა სცადა აღდგენა, მაგრამ მასშტაბურობის გამო ვერ დაიძრა საკითხი. 2013 წელს დაიწყო პროექტის კეთება, შემდგომ ფონდმა „ქართუმ“ აიღო თავის თავზე ეს საქმე, გაკეთდა მთლიანი არქეოლოგია და გამაგრდა საფუძველი. საბოლოოდ ფონდი „ქართუს“, ბატონი ბიძინა ივანიშვილის და მისი ოჯახის პირადი ჩართულობით მოხდა მისი აღდგენა

ეს არის ადგილი, სადაც ანდრია პირველწოდებულმა დააფუძნა პირველი საეპისკოპოსო, ეს ნიშნავს ეკლესიის დაფუძნებას, აქ დაფუძნდა ეკლესია. ანდრია პირველწოდებულმა აკურთხა ეპისკოპოსი, სასულიერო პირები, დატოვა ღვთისმშობლის ხელთუქმნელი ხატი, რომელიც თავად ღვთისმშობელმა გამოატანა საქართველოში და ასე ჩაეყარა საფუძველი ქრისტიანობას და მართლმადიდებელ ეკლესიას საქართველოში, - განაცხადა გადაცემაში „იმედის კვირა“ ახალციხის და ტაო-კლარჯეთის მიტროპოლიტმა თეოდორე ჭუაძემ აწყურის ღვთისმშობლის მიძინების ტაძარზე საუბრისას.

მიტროპოლიტმა საქართველოსთვის აწყურის ტაძრის მნიშვნელობა დეტალურად განმარტა და გაიხსენა, თუ რა მდგომარეობაში იყო ტაძარი, ვიდრე ფონდი „ქართუსა“ და ბიძინა ივანიშვილის ჩართულობით მოხდებოდა მისი აღდგენა.

„პირველი ტაძარი თავად ანდრია პირველწოდებულმა ააშენა აქ, შემდგომ უკვე ვახტანგ გორგასალმა ააშენა დიდი ტაძარი და ახლა რაც არის, ამ სახით აშენდა მე-10 საუკუნეში. მას შემდეგ ბევრჯერ დაინგრა, იყო დიდი მიწისძვრა, შემდგომ იყო ძალიან ბევრი რთული პერიოდი საქართველოში და ჩვენამდე ძალიან მძიმე მდგომარეობაში იყო შემორჩენილი.

რამდენიმე ბიზნესმენმა სცადა აღდგენა, მაგრამ ამ მასშტაბურობის გამო ვერ დაიძრა საკითხი. 2013 წელს დაიწყო მასშტაბურად პროექტის კეთება, შემდგომ ფონდმა „ქართუმ“ აიღო თავის თავზე ეს საქმე, გაკეთდა მთლიანი არქეოლოგია და გამაგრდა საფუძველი. საბოლოოდ ფონდი „ქართუს“, ბატონი ბიძინა ივანიშვილის და მისი ოჯახის პირადი ჩართულობით მოხდა მისი აღდგენა.

აქ დაიბადა საქართველოს ეკლესია და ამას ძალიან დიდი მნიშვნელობა აქვს თითოეული ჩვენგანისთვის. მინდა განსაკუთრებული მადლობა გადავუხადო ბატონ ბიძინა ივანიშვილს და მის ოჯახს, რომელმაც მასშტაბურად აღადგინა ტაძარი. მე დარწმუნებული ვარ, რომ ძალიან მალე ვაკურთხებთ ამ ტაძარს“, - აღნიშნა მეუფე თეოდორემ.