გულშემატკივართა თხოვნით თასის ნახევარფინალში „ტორპედოს“ ძირითადი გუნდი ითამაშებს

დავით ყიფიანის სახელობის თასის ნახევარფინალში ქუთაისის „ტორპედო“ თბილისში „საბურთალოს“ დაუპირისპირდება. „ტორპედოს“ ფეხბურთელები მატჩში მონაწილეობაზე კლუბის გულშემატკივრებმა დაითანხმეს, ამის შესახებ გუნდის ფან-კლუბის, „ჩვენ ვართ ტორპედო“ Facebook-ზე წერს.

გულშემატკივრების თქმით, ისინი სრულად იზიარებენ ფეხბურთელების პოზიციას, რომ სანამ დავალიანება არ იქნება მათ მიმართ გასტუმრებული, აღარ ითამაშებენ, თუმცა როგორც გულშემატკივრები სოციალურ ქსელში წერენ, „საბურთალოსთან“ თამაშმა, რომელიც ხვალ, 23 ოქტომბერს გაიმართება, შესაძლოა კლუბის მომავალი რადიკალურად შეცვალოს.

„ამიტომ ფანები შევხვდით ფეხბურთელებს, ვისაუბრეთ და მივედით იმ დასკვნამდე, რომ ამ კლუბს ჩვენს მეტი პატრონი არ ჰყავს... ისევ ჩვენი, ფანების, ფეხბურთელებისა და მწვრთნელების გადასარჩენია გუნდი.

მიუხედავად იმისა, რომ დღემდე კლუბში სასიკეთოდ არაფერი შეცვლილა, ფეხბურთელებმა მაინც გაითვალისწინეს ფანების თხოვნა და ხვალ, სეზონის მნიშვნელოვან მატჩში მოედანზე სათამაშოდ მთავარი გუნდი გავა.

ტორპედოს ვერ დაეხმარება როინ კვასხვაძე, რომელმაც ვარჯიშზე მძიმე ტრავმა მიიღო და სეზონი ნაადრევად დაასრულა.

რაც არ უნდა მოხდეს ხვალ, როგორც არ უნდა დასრულდეს შეხვედრა, ნებისმიერ შემთხვევაში ფეხბურთელებს ჩვენგან მადლობა ეკუთვნით. მთელი სეზონია ბიჭები ამდენი პრობლემის ფონზე გულშემატკივრის თხოვნებს ითვალისწინებენ და ჩვენთვის მაქსიმუმს აკეთებენ. ზუსტად ვიცით, ადრე თუ გვიან თითოეულ მათგანს დაუფასდება ეს ყველაფერი.

მანამდე კი ხვალ სეზონის მატჩია და ყველა უნდა წავიდეთ თბილისში. ბიჭებს ისე უნდა დავუდგეთ გვერდით, როგორც ისინი უდგანან კლუბს!“, - წერია გულშემატკივრების მიერ გავრცელებულ განცხადებაში.

ქუთაისის „ტორპედოს“ ფეხბურთელებმა კლუბში და სამწვრთნელ ბაზაზე შექმნილი გაუსაძლისი პირობების გამო, ვარჯიში 9 ოქტომბერს შეწყვიტეს. 

სექტემბრის დასაწყისში „ტორპედოს“ აღმასრულებელ დირექტორად თემურ ჩეჩელაშვილი დაინიშნა. 30 აგვისტოს ცნობილი გახდა, რომ ქუთაისის მერიამ კლუბ "ტორპედოს" დაბრუნების პროცესი დაიწყო. მაშინ ქუთაისის მერიამ გაავრცელა ინფორმაცია, რომ ქალაქის მუნიციპალიტეტმა ოფიციალურად მიმართა შპს „საფეხბურთო კლუბ ტორპედო ქუთაისის“ ადმინისტრაციას.

მიმდინარე სეზონში ქუთაისურ კლუბს ფინანსური პრობლემები შეექმნა, რის გამოც „ტორპედო“ ათამდე ფეხბურთელმა დატოვა. ქუთაისური კლუბის გულშემატკივრებმა ზაალ ჩაჩავას „ტორპედოდან“ წასვლის მოთხოვნით რამდენჯერმე საპროტესტო აქცია გამართეს. ქუთაისის მერმა გიორგი ჭიღვარიამ მაშინ გულშემატკივრების პრეტენზიებს სამართლიანი უწოდა