გოჩა სვანიძემ რაგბის კავშირის პრეზიდენტის არჩევნების გადადების მიზეზები განმარტა

„რაგბის კავშირის პრეზიდენტის არჩევნები არ შედგა იმიტომ რომ, კრების ჩატარების დროს ჩვენ წესდებაში გვაქვს ლეგიტიმაციის მაღალი ხარისხი. რაც იმას ნიშნავს, რომ უნდა იყოს წარმოდგენილი კლუბების ნახევარზე მეტი და ხმების 2/3“, - ამის შესახებ რაგბის კავშირის მოქმედმა პრეზიდენტმა გოჩა სვანიძემ ტელეკომპანია იმედის გადაცემა „დღის ქრონიკაში“ განაცხადა.  

„მოვიდა 43 ხმა. ხმების ნახევარზე მეტი იყო, მაგრამ სამწუხაროდ 2/3 იყო საჭირო, რომ კრება უფლებამოსილი ყოფილიყო და მიეღო გადაწყვეტილებები. საყურადღებოა, რომ ყველა ის დელეგატი რომელიც დღეს მოვიდა გახლდათ მხოლოდ ჩემი მომხრე. წარდგინებაც არის მათგან გაკეთებული“, - განაცხადა გოჩა სვანიძემ.  

მისი თქმით, რაგბის კავშირის პრეზიდენტის არჩევნების გადადების მიზეზი კრების ბოიკოტირება გახდა. „კერძოდ, იმ კლუბების მიერ რომლებიც არ უჭერენ გოჩა სვანიძეს მხარს, ან ნეიტრალურები არიან. ასე ერთსულოვნად ბოიკოტირება საეჭვოც არის. ჩვენ უნდა ვიცოდეთ და ვისწავლოთ რას ნიშნავს არჩევნები. ეს ნიშნავს დააფიქსირო შენი პოზიცია. არგამოცხადებაც პოზიციაა. თუმცა მხოლოდ დროში გაიწელება მოვლენები“, -აღნიშნა გოჩა სვანიძემ.  

მისი ინფორმაციით, შემდეგი მოვლენები წესდების თანახმად უნდა განვითარდეს. „განმეორებითი კრება უნდა გაიმართოს და ლეგიტიმაციის ხარისხი იწევს დაბლა. გადაწყვეტილების მისაღებად საკმარისია ის რაოდენობა, რაც დღეს მოვიდა. საკმარისია 40 დამატებული 1 ხმა. გადაწყვეტილება უკვე მიიღება ამ ფორმატში. ეს უნდა მოხდეს კრების გადადებიდან არა უადრეს 10 დღისა და არა უგვიანეს 30 დღისა. ამაზე გამგეობა იმსჯელებს და გამოაცხადებს კრების თარიღს“, -აღნიშნა გოჩა სვანიძემ.  

დღეს, საქართველოს რაგბის კავშირის პრეზიდენტის არჩევნები გადაიდო. ამის მიზეზი საარჩევნო-საანგარიშო ყრილობაზე კვორუმის არარსებობა გახდა.

რაგბის კავშირის პრეზიდენტს 4 წლის ვადით ხმის მიცემის უფლების მქონე 42 სუბიექტი აირჩევს. დღეს რაგბის კავშირის პრეზიდენტობის ერთ-ერთმა კანდიდატმა, ბაჩო ხურციძემ მოქმედი პრეზიდენტი, გოჩა სვანიძე საარჩევნო ხმების მოსაპოვებლად კლუბების ხელოვნურად შექმნაში დაადანაშაულა.