ლევან მაისაშვილი: წინ არის რუსეთთან თამაში, რომელიც ყოველთვის განსაკუთრებულია

„ბორჯღალოსნების“ მთავარმა მწვრთნელმა, ლევან მაისაშვილმა პორტუგალიასთან გამართული მატჩი შეაფასა. მისი თქმით, მიუხედავად გამარჯვებისა, იყო ხარვეზები, რომელიც მომდევნო მატჩებში უნდა გამოსწორდეს. შემდეგი თამაში საქართველოს ნაკრებს რუსეთთან უწევს, ამ მატჩს კი, საქართველოს ნაკრების მწვრთნელი განსაკუთრებულად მიიჩნევს.

ლევან მაისაშვილის თქმით, პორტუგალიასთან დღეს გამართული შეხვედრა ერთ-ერთი სამაგიდო თამაში იყო სამომავლოდ და დასკვნების გასაკეთებლად.

„თამაში ცუდად დავიწყეთ. თავიდანვე, მოწინააღმდეგეს მივეცით საჩუქარი და მოწინააღმდეგემ ეს ძალიან კარგად გამოიყენა. ჩვენთვის არ იყო სიახლე, რომ პორტუგალია მებრძოლი გუნდია და ყველაფერს გააკეთებდა ჩვენთან სათამაშოდ. ფაქტია, რომ უდისციპლინობამ და შეუფასებლობამ ამ წნეხში მოგვაქცია.

კარგია, რომ მაინც მოვახერხეთ თამაშში დარჩენა, გარდატეხა მოვახდინეთ და რაც გვინდოდა ბოლოს, ის გავაკეთეთ. ჩემთვის ძალიან საინტერესო თამაში იყო. ნდობის მომენტი იყო. ვიღაცამ გაამართლა და ვიღაცამ ვერ გაამართლა. სხვაგან ამ ტიპის ექსპერიმენტებს ვერ ჩავატარებდით.

ძალიან საინტერესო თამაში იყო მწვრთნელებისთვის. ეს ერთ-ერთი სამაგიდო თამაში იყო სამომავლოდ და დასკვნების გასაკეთებლად. წინ არის რუსეთთან თამაში. რუსეთთან თამაში ყოველთვის განსაკუთრებულია და გასაგებია რატომაც.

ამ ზეწოლის გარდა, ერთი რიგითი თამაშია, სადაც უნდა ვეცადოთ უკეთესი თამაში ვაჩვენოთ. დღეისთვისაც ვცდილობდით, რომ უკეთესი თამაში გვეჩვენებინა, მაგრამ გამოჩნდა ისეთი რაღაცები, რაც ხელისშემშლელი აღმოჩნდა. საინტერესო პროცესია, რომელიც უნდა დავძლიოთ. ჩვენთვის ყველაზე მთავარია დისციპლინა და თამაშის მართვა. უკეთ უნდა შევძლოთ მომავალში თამაშის მართვა. დღეს იყო მომენტები, როდესაც მოწინააღმდეგე მართავდა თამაშს და არა ჩვენ. მეტი ლიდერი გვჭირდება და მეტი თამაშის მმართველი“, - განუცხადა „ქრონიკას“ ლევან მაისაშვილმა.

თავის მხრივ, მოთამაშე ბექა გორგაძემ მატჩს საკმაოდ რთული თამაში უწოდა.

„ბევრი გაუთვალისწინებელი შემთხვევა მოგვივიდა, რამაც შემდეგ სირთულეები შეგვიქმნა და მოწინააღმდეგეს ძალიან მარტივი ქულები ვაჩუქეთ. ამ ყველაფერმა გამოგვაფხიზლა,მოვახერხეთ მეორე ტაიმის ბოლოს მაქსიმალურად ქულების აღება, გამარჯვება და ერთი ტურით ადრე. ერთი თამაში გვრჩება ძალიან პრინციპული. ეს თამაშია რუსეთთან მომავალ შაბათს. ჩვენ შევეცდებით, რომ მთელი ტურნირის ნაშრომი ერთად ჩავდოთ და კარგი ხარისხიანი თამაში შევთავაზოთ გულშემატკივარს“, - განაცხადა ბექა გორგოძემ.

რაგბი ევროპის ჩემპიონატის მეოთხე ტურში, საქართველოს ნაკრებმა პარიზში, „სტად ჟან ბუენზე“ პორტუგალიის ნაკრები 39:24 დაამარცხა.