ქართველი და რუსი მორაგბეების დაპირისპირების პირველი ნახევარი დასრულდა

თბილისში, მიხეილ მესხის სტადიონზე, საქართველოსა და რუსეთის მორაგბეთა ნაკრებების დაპირისპირების პირველი ტაიმი დასრულდა. პირდაპირ ეთერს ტელეკომპანია „იმედი“ გადასცემს.

2020 წლის რაგბი ევროპის ჩემპიონატის დასკვნითი შეხვედრის პირველი ნახევარი ანგარიშით 0:0 დასრულდა.

აღსანიშნავია, რომ ამ შეხვედრას, სატურნირო თვალსაზრისით, საქართველოს ნაკრებისთვის მნიშვნელობა აღარ აქვს, რადგან ქართველმა სპორტსმენებმა შარშან, ერთი ტურით ადრე, უკვე გაინაღდეს რაგბი ევროპის ჩემპიონის ტიტული.

საქართველოსა და რუსეთის შეხვედრა გასულ წელს ორჯერ, პანდემიის გამო გადაიდო. კოვიდპანდემიით გამოწვეული შეზღუდვებიდან გამომდინარე, დღევანდელ შეხვედრას გულშემატკივარი ვერ ესწრება.

შერკინების პირველ ხაზში ორწლიანი შესვენების შემდეგ ბრუნდება გამოცდილი ბურჯი ზურაბ ჟვანია, რომელიც ბექა გიგაშვილს შუწყვილდება, კვაჭი კი შალვა მამუკაშვილია. აღსანიშნავია, რომ უკანასკნელი 18 მატჩიდან, 17 შემთხვევაში მამუკაშვილი ძირითად შემადგენლობაში იყო.

მეორე ხაზში ერთმანეთს პირველად შეუწყვილდებიან ლაშა ჯაიანი და გიორგი ჯავახია, რომელთა კეპების საერთო რაოდენობა მხოლოდ 10-ია. ჯავახიას ნაკრების კვართით ოთხჯერ უთამაშია, თუმცა ყველა ჯერზე შეცვლაზე შევიდა და ახლა სასტარტოში პირველადაა.

2018 წლის ივნისის შემდეგ, პირველადაა სასტარტო შემადგენლობაში მიხეილ გაჩეჩილაძე. მის ანგარიშზე 12 კეპია, თუმცა სასტარტოში აქამდე მხოლოდ 3-ჯერ უთამაშია და ბოლო ხუთ შემთხვევაში მარქაფაში იყო. მეორე ფლანკერი ბექა საღინაძე იქნება, რომელმაც ამ პოზიციაზე ადგილი დაიმკვიდრა, ხოლო შერკინების შემკვრელად ახალგაზრდა თორნიკე ჯალაღონიას ვიხილავთ.

სასტარტო შემადგენლობაში მყოფი მორკინალების კეპების ჯამი 179-ს შეადგენს და მათი დაახლოებით ორი-მესამედი ორ მორაგბეზე – ჟვანიასა და მამუკაშვილზე მოდის.