ვაკო ყაზაიშვილი კარიერას სამხრეთ კორეაში გააგრძელებს

საქართველოს ნაკრების ფეხბურთელმა ვაკო ყაზაიშვილმა კარიერის სამხრეთ კორეაში გაგრძელება გადაწყვიტა. 28 წლის ნახევარმცველმა კონტრაქტი აზიის ჩემპიონთა ლიგის მოქმედ გამარჯვებულთან, „ულსან ჰიუნდაისთან“ გააფორმა.

კლუბის ვებგვერდის ინფორმაციით, ქართველ სპორტსმენს გარკვეული პერიოდის განმავლობაში თვითიზოლაციაში მოუწევს ყოფნა და გულშემატკივარს ამის შემდეგ წარუდგენენ.

„ულსაიში“ ვაკო ავსტრალიელი ჯეისონ დავიდსონის, ნიდერლანდელი დეივ ბალტჰუისისა და ავსტრიელი ლუკას ჰინტერსერის შემდეგ მეოთხე ლეგიონერია.

ყაზაიშვილი „საბურთალოს“ აკადემიის აღზრდილია, კარიერის მანძილზე კი „ვიტესში“, „ლეგიასა“ და „სან ხოსეში“ უთამაშია. საქართველოს ეროვნულ ნაკრებში ჩატარებულ 53 შეხვედრაში კი მის ანგარიშზე 11 გოლია.