ძიუდოს ფედერაციის პრეზიდენტმა ნაკრების კაპიტანს მოუწოდა ბოიკოტი შეწყვიტოს

ძიუდოს ფედერაციის პრეზიდენტმა ნაკრების კაპიტანს მოუწოდა ბოიკოტი შეწყვიტოს და პროცესები კონსტრუქციული დიალოგით გაგრძელდეს. დავით ქევხიშვილი ეჭვობს, რომ პროცესების უკან გარკვეული ჯგუფი დგას.

"მინდა ვარლამ ლიპარტელიანს მივმართო, რომ მასზე წინ მე ვიყავი გუნდის კაპიტანი 4 წლის განმავლობაში, მასზე წინ ზუსტად ეს პროცესები იყო 2009 წელს, როდესაც ჩვენ პრობლემრბი გვქონდა ნაკრებში მაგრამ ამ პრობლემების შესახებ მე არასოდეს არ მისაუბრია მათ შორის არც ფედერაციის პრეზიდენტთან, ჩავთვალე საჭიროდ რომ მხოლოდ მთავარ მწვრთნელთან უნდა მეთქვა ეს პრობლემები, ბოიკოტი არ გამომიცხადებია არცერთი შეკრებისთვის, არცერთი შეჯიბრისთვის. მათ არანაირი კითხვები არ ჰქონდათ, რომელზეც შეიძლებოდა პასუხი გაცემულიყო, ეს იყო მცდელობა რომ თითქოს საზოგადოებისთვის დაენახვებინათ რომ პრობლემებია ფედერაციაში. რა კითხვებიც მოვისმინე ამ სამი დღის განმავლობაში მე დავაჯამე და შესაბამისად მოვიწვიე ყრილობა, ვის წინაშეც ვარ პასუხისმგებელი პირველ რიგში. ეს პროცესები ასე არ უნდა გაგრძელდეს, ვგულისხმობ იმას რომ სპორტსმენები არ არიან ის კომპეტენტური პირები, ვინც ასეთ ფორმატში უნდა ითხოვდნენ ფედერაციის პრეზიდენტის გადადგომას.  არ ვიცავ დავით ქევხიშვილს როგორც ფედერაციის პრეზიდენტს, მე ვიცავ ფედერაციის პრეზიდენტს როგორც ინსტიტუტს," - განაცხადა ქევხიშვილმა.

ფედერაციის პრეზიდენტი იმ ბრალდებასაც გამოეხმაურა, რომ თითქოს ძიუდოისტებს ჩემპიონატებზე სიარული საკუთარი ხარჯებით უწევთ. ქევხიშვილი ამბობს, რომ შემთხვევა, რომელზეც ვარლამ ლიპარტელიანი ლაპარაკობს, სიმართლეს არ შეესაბამება.

"თუ პაპინაშვილისთის მოვითხოვეთ თანხა და მივიღეთ, რატომ არ მოვითხოვდით ლიპარტელიანისთვის? თუ პაპინაშვილმა შეძლო და მწვრთნელები იპოვნა, რატომ ვერ მოახერხა ეს ლიპარტელიანმა? 29-ში მიდიოდა ტურნირზე და 25-ში უკვე გვქონდა მოთხოვნილი თანხა, 29-ში ჩაირიცხა სასტუმროს თანხაც და 29-ში აიღო ხელზე ასაღებიც, არაერთხელ ვთხოვეთ რომ მოეტანა ბილეთი, რომ ჩვენ აგვენაზღაურებინა, არაერთხელ თხოვა ჩემმა ბუღალტერმა, რადგან ანგარიში უნდა გადაგვეგზავნა სამინისტროში, მაგრამ მან ეს არ გააკეთა. სრული პასუხისმგებლობით ვაცხადებ, რომ ნაკრების ყველა წევრი ევროპის და მსოფლიო ჩემპიონატებზე ფინანსდება ფედერაციის მხრიდან, რაც შეეხება სხვა ჩემპიონატებს, ყველა დაფინანსებას ბუნებრივია ფედერაცია ვერ გაწვდება" - აღნიშნა ქევხიშვილმა.

რამდენიმე დღის წინ ძიუდოისტების ნაწილმა დავით ქევხიშვილის გადადგომის მოთხოვნით ფედერაციასთან აქცია გამართა. სპორტსმენების პროტესტი მას შემდეგ დაიწყო, რაც ქართული ძიუდოს ისტორიაში პირველად, ევროპის ჩემპიონატიდან ქართველი ძიუდოისტები უმედლოდ დაბრუნდნენ.

თელ-ავივიდან ნაკრების დაბრუნების შემდეგ კი დავით ქევხიშვილმა სამწვრთნელო შტაბი დაითხოვა. 

დღეს ცნობილი გახდა, რომ ძიუდოს ფედერაციაში არსებული სიტუაციის შესასწავლად სპეციალური კომისია შეიქმნა.