ძიუდოს ფედერაცია ავთანდილ ჭრიკიშვილის ბრალდებას პასუხობს

ძიუდოს ფედერაცია, ავთანდილ ჭრიკიშვილის მიერ სოციალურ ქსელში გავრცელებულ განცხადებას პასუხობს, რომელსაც სოციალურ ქსელში ავრცელებს.

ფედერაციის განცხადებით, მსოფლიო ჩემპიონატზე გასამგზავრებელი სპორტსმენების შესახებ გადაწვეტილება არ არის მიღებული.

„საქართველოს ძიუდოს ეროვნული ფედერაციის დროებით შექმნილი მმართველობითი სამუშაო ჯგუფის ბოლო შეხვედრის დროს, ძიუდოს ეროვნული ნაკრების გუნდის მწვრთნელებისთვის მიიღეს დადგენილება, რომლის მიხედვით, 2018 წლის 20-27 სექტემბრის მოახლოებულ მსოფლიოს ჩემპიონატთან დაკავშირებით, ნაკრები გუნდის ჩამოყალიბებისა და დაკომპლექტების მიზნით, გუნდების მწვრთნელებს დაევალათ ურთიერთშეთანხმებით წარმოადგინონ გუნდის დაკომპლექტების ხედვა.

საბოლოო გადაწყვეტილება ერთობლივად დაკომპლექტებული გუნდის შესახებ მწვრთნელებმა დღემდე ვერ წარმოადგინეს. ბუნებრივია, ჩვენი მხრიდან რაიმე ტიპის განცხადების გაკეთება არ იქნება მიზანშეწონილი,“- აღნიშნულია ფედერაციის განცხადებაში.

ავთანდილ ჭრიკიშვილმა სოციალურ ქსელში გაავრცელა განცხადება, რომელშიც ამბობს, რომ ძიუდოს ფედერაცია იმართება კვლავ დავით ქევხიშვილის მიერ და ის, მიკერძოებულად ცდილობს მისი ბედის გადაწყვეტას.

ძიუდოს ისტორიაში არ არსებობს შემთხვევა, რომ გუნდი დადგეს პირადი სიმპატიების საფუძველზე. გუნდი უნდა შედგეს შედეგებიდან გამომდინარე. ამ შემთხვევაში, ბოლო და საუკეთესო შედეგი მაქვს მე და ის შედეგები, რაც ჰქონდა ბექას, დაეხმარა მას ეასპარეზა ევროპის ჩემპიონატზე, სადაც მან შედეგი ვერ გააკეთა. შესაბამისად, 3-ჯერ ძლიერ ტურნირზე მას არ ეკუთვნის უკონკურენციოდ და უჭიდავებლად დაყენება. 
ყველას, ვისაც ხელეწიფება ამ პროცესებში ჩართვა, ვთხოვ, დამეხმარონ ჩემი უფლებების დაცვაში. მე ვითხოვ ჭიდაობას და ჯანსაღ კონკურენციას ტატამზე“-წერს ჭრიკიშვილი.

ქევხიშვილმა თანამდებობა 2 ივნისს დატოვა.სპორტსმენების პროტესტი მას შემდეგ დაიწყო, რაც ქართული ძიუდოს ისტორიაში პირველად, ევროპის ჩემპიონატიდან ქართველი ძიუდოისტები უმედლოდ დაბრუნდნენ.

თელ-ავივიდან ნაკრების დაბრუნების შემდეგ დავით ქევხიშვილმა სამწვრთნელო შტაბი დაითხოვა.

ძიუდოს ეროვნულმა ნაკრებმა ვარჯიში უკვე განაახლა. ძიუდოისტებმა პროტესტის ნიშნად ვარჯიში ზუსტად ერთი თვის წინ, ფედერაციის პრეზიდენტის, დავით ქევხიშვილის გადადგომის მოთხოვნით შეწყვიტეს.