უკრაინელმა ფეხბურთელმა თამაშის დაწყების წინ რუსეთის დროშას ზურგი შეაქცია

რუსეთის პირველი ლიგის თამაშში, სადაც „ნიჟნი ნოვგოროდი“ „სოჭთან“ გასვლით შეხვედრას მართავდა, „ნიჟნი ნოვგოროდის“ უკრაინელმა მცველი ვიტალი ფედორივი ჰიმნის შესრულების დროს რუსეთის დროშისკენ არ შებრუნდა.

ის დემონსტრაციულად უძრავად იდგა და თანაგუნდელებისგან განსხვავებით, რუსეთს დროშისკენ არც გაუხედავს. ამის შესახებ რუსული მედია წერს. 

მატჩის შემდეგ, რომელიც „ნიჟნი ნოვგოროდის“ სასარგებლოდ ანგარიშით 1:0 დასრულდა, რუსულმა მედიამ და გულშემატკივრებმა ფედორივის საქციელი გააკრიტიკეს.

დღეს კი კლუბის პრესამსახურმა განმარტა, რომ უკრაინელს რუსების მიმართ უპატივცემულობა არ გამოუვლენია და ის უბრალოდ ლოცულობდა.

ფეხბურთელის განმარტებით, ის როგორც მორწმუნე ადამიანი, თამაშის წინ ლოცულობს.

თუმცა როგორც აღმოჩნდა, ეს პირველი ფაქტი არ არის. ფედორივი ანალოგიურად „მორდოვიასთან“ მატჩის დროსაც მოიქცა, მაგრამ მაშინ მის საქციელს დიდი რეზონანსი არ მოჰყოლია.

ვიტალი ფედორივმა საფეხბურთო კარიერა კიევის "დინამოში" დაიწყო, სხვადასხვა დროს თამაშობდა"ამკარში", "სპარტაკში", "გოვერლაში", "ოლიმპიკში", 2 მატჩი ჩაატრა უკრაინის ეროვნულ ნაკრებში. „ნიჟნი ნოვგოროდში“ კი 2018 წლის თებერვალში გადავიდა.