ტოკიოს აკვარიუმი მოსახლეობას სთხოვს, მათ ბინადრებს ადამიანების არსებობა ვიდეოზარის საშუალებით შეახსენონ

ზოოპარკის ბინადრები ვიზიტორების გარეშე თავს მარტო გრძნობენ, ამ შინაარსის სტატიებს უცხოური გამოცემები წერენ.

ზოოპარკები მთელი მსოფლიოს მასშტაბით პანდემიის გამო დაიხურნენ, ზოგიერთ დაწესებულებაში პინგვინები და ფლამინგოები გაასეირნეს ობიექტის იმ ნაწილში, რომელიც აქამდე საერთოდ არ უნახავთ.

დუბლინის ზოოპარკის დირექტორი ლეო ოსტერვეგელი, რომელიც ყოველწლიურად 1.2 მლნ ვიზიტორს იღებს, ამბობს, რომ ცხოველები მას ახლა უფრო მეტად გაკვირვებულები უყურებენ. ფენიქსის ზოოპარკის კომუნიკაციების მენეჯერი კი ამბობს, რომ მათ ბინადრებს გულშემატკივრებთან ურთიერთობა ენატრებათ და ელოდებიან, როდის მიეცემათ შესაძლებლობა სტუმრებს, რომ ისევ ეწვიონ ზოოპარკს.

„ვამჩნევთ, რომ ზოგიერთი ცხოველი დიდად კმაყოფილი არ არის სახლში დარჩენისა და სოციალური დისტანციის დაცვის შესახებ გადაწყვეტილების გამო. განსაკუთრებით პრიმატები ამჩნევენ სტუმრების არყოფნას და ეძებენ მათ“, - ამბობს ლინდა ჰარდვიკი.

ტოკიოში მდებარე აკვარიუმის თანამშრომლები კი საზოგადოებას მოუწოდებენ, გველთევზებს ვიდეოზარის საშუალებით შეახსენონ, რომ ადამიანები არსებობენ.

ობიექტმა Twitter-ზე გაავრცელა ტექსტი, რომელშიც აღნიშნულია, რომ ბინადრები ვერ ხედავენ ადამიანებს, გარდა მომვლელებისა და მათ უკვე ავიწყდებათ ადამიანები.

„აქედან გამომდინარე გვაქვს დაუყოვნებლივი თხოვნა, შეგიძლიათ, თქვენი სახეები აკვარიუმის გველთევზებს სახლიდან აჩვენოთ?“, - აღნიშნულია ტექსტში.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.