პრესა: დონალდ ტრამპისა და პორნომსახიობის ურთიერთობაზე სკანდალის გამო, მელანია დავოსში არ წავიდა

მელანია ტრამპმა თავის მეუღლესთან, აშშ-ს პრეზიდენტ დონალდ ტრამპთან ერთად დავოსში, მსოფლიო ეკონომიკურ ფორუმზე დაგეგმილი გამგზავრება გადაიფიქრა. ამან გარკვეული კითხვები გააჩინა, მით უფრო, რომ ეს მათი ქორწინების მე-13 წლისთავზე მოხდა. ამის შესახებ Die Welt-ი წერს. 

აშშ-ის პირველი ლედის ოფისში ამ გადაწყვეტილების იმით ხსნიან, რომ მას ხელი დროებითმა საორგანიზაციო პრობლემებმა შეუშალა.

მედიას ეს მიზეზი არადამაჯერებლად მიაჩნია, ვინაიდან მელანიას უარი, სერიოზულ გამოცემებში დონალდ ტრამპსა და პორნომსახიობ სტორმი დენიელს (სასცენო ფსევდონიმი. ნამდვილი სახელია სტეფანი კლიფორდი) შორის ურთიერთობაზე ცნობების გავრცელებას დაემთხვა.

არსებული ინფორმაციით პორნოვარსკვლავთან ტრამპის ურთიერთობა 2006 წელს დაიწყო, ანუ მალევე მას შემდეგ, რაც მელანიამ ვაჟი, ბერონ ტრამპი გააჩინა. დენიელსმა არჩევნებამდე ამ ისტორიის შესახებ რამდენიმე მედიასაშუალებას უამბო. The Wall Street Journal-ის ცნობით, ტრამპის ადვოკატმა დუმილისთვის ქალს 130 ათასი დოლარი გადაუხადა. ქალმაც მოგვიანებით ინფორმაცია პრეზიდენტთან სერიოზულ ურთიერთობაზე უარყო და ყველას უამბო, რომ ეს ურთიერთობა მხოლოდ 1 წელს გრძელდებოდა. 

ამ ინტრიგის გამო, ტრამპის მხარდამჭერი ევანგელისტი ქრისტიანებიც უხერხულ მდგომარეობაში ჩავარდნენ, - წერს გამოცემა და დასძენს, რომ მელანია დავოსში არგამგზავრებით შეეცადა თავი დაეღწია დამცირებისა და საჯარო კითხვებზე პასუხისათვის.