დიდ ბრიტანეთში პრინც ჰარის და მეგან მარკლის ქორწილის ცერემონია დაიწყო. LIVE

თბილისის დროით 15:00 საათზე ლონდონში პრინცი ჰარი და მეგან მარკლი იქორწინებენ. ჯვრისწერის ცერემონია უინძორის სასახლის წმინდა გიორგის სამრეკლოში გაიმართება. პროცესია 1 საათს გასტანს. წყვილს ჯვარს კენტერბერის არქიეპისკოპოსი, ჯასტინ უელბი დაწერს.
 
ცერემონიის ადგილი

განსხვავებით თავისი მამის და უფროსი ძმისაგან, რომელთა საქორწინო ცერემონიები ლონდონში (წმინდა პავლეს ტაძარსა და ვესტმინსტერის სააბატოში) გაიმართა, პრინცმა ჰარიმ ცერემონიისათვის ადგილი ქალაქგარეთ, ვინძორის სამეფო რეზიდენცია შეარჩია - სავარაუდოდ, ნაკლები პომპეზურობისათვის.

ვინძორის სასახლის წმინდა გიორგის სამრეკლო, სადაც ქორწილი გაიმართება - სამეფო ოჯახისათვის მნიშვნელოვანი და სიმბოლური ადგილია. მასთან ახლოს არის ვინძორის სასახლე - ელისაბედ მეორის საყვარელი რეზიდენცია, სადაც ის ყოველ შაბათ-კვირას ისვენებს და ახლახან ბრილიანტის ქორწილიც აღნიშნა. ამ ეკლესიაში 1984 წელს მონათლეს თავად პრინცი ჰარი, ასევე აქვე მიიღეს კურთხევა ქორწინებაზე 2005 წელს პრინცმა ჩარლზმა და კამილა პარკერ-ბოულზმა.

ეკლესიაში შეიძლება წყვილის ყველაზე ახლობელი 600 სტუმარი განთავსდეს. საქმროს მეჯვარე მისი ძმა, კემბრიჯის ჰერცოგი უილიამია. უილიამის შვილები - სამი წლის პრინცესა შარლოტა და ოთხი წლის პრინცი ჯორჯი ასევე მიიღებენ მონაწილეობას ცერემონიაში, ისინი პატარა პაჟებს შორის იქნებიან.

ქორწილის მსახურებას ჩაატარებს ვინძორის ტაძრის წინამძღვარი დევიდ კონერი, ხოლო უშუალოდ ჯვრისწერას - კენტერბერის არქიეპისკოპოსი ჯასტინ უელბი. ამის შემდეგ იქადაგებს ეპისკოპოსი მაიკლ კარი - პირველი შავკანიანი მღვდელი, რომელიც აშშ-ის ეპისკოპალური ეკლესიის მეთაური გახდა. ქორწილამდე რამდენიმე თვით ადრე  მეგან მარკლმა, რომელიც პროტესტანტების ოჯახში დაიბადა და შემდეგ კათოლიკურ სკოლაში სწავლობდა, ანგლიკანური წესით მოინათლა, მიუხედავად იმისა, რომ ეს ქორწინებისათვის აუცილებელი პირობა არ იყო. 

სამეფო ქორწილის სტუმრებს შეუძლიათ განთავსდნენ არამხოლოდ ტაძარში - 2500-ზე მეტი სტუმარი სამრეკლოს მიმდებარე ტერიტორიაზე განთავსდება. ისინი დაინახავენ თუ როგორ გაემგზავრებიან ახალდაქორწინებულები ჯვრისწერის შემდეგ ეტლით ქალაქში. სტუმრებს შორის არიან საქველმოქმედო ორგანიზაციების ახალგაზრდა ვოლონტიორები, რომლებთანაც ჰარი და მეგანი თანამშრომლობენ, ასევე რეგიონული მოძრაობების აქტივისტები მთელი ქვეყნიდან, 100 მოსწავლე ადგილობრივი სკოლებიდან და სასახლის თანამშრომლები.

ჯვრისწერის შემდეგ პროცესია ვინძორის ქუჩებში ათასობით მაყურებელის თანდასწრებით გაგრძელდება. შემდეგ ეტლი ვინძორის სასახლეში დაბრუნდება, სადაც წმინდა გეორგის დარბაზში, დედოფალი ახალდაქორწინებულებს და მათ 600 სტუმარს საქორწინო სადილზე უმასპინძლებს.

ამავე საღამოს, ფროგმორ-ჰაუსის სამეფო რეზიდენციაში, რომელიც ვინძორიდან რეზიდენციიდან ერთ კილომეტრშია, 200 სტუმრისათვის საქორწინო მიღება გაიმართება, რომლის ორგანიზატორიც საქმროს მამა, პრინცი ჩარლზია. სწორედ აქ არის გადაღებული ჰარის და მეგანის ოფიციალური ფოტოსესია, რომელიც მათ ნიშნობას მიეძღვნა.

ვინ დაესწრება ქორწილს და ვინ - არა

სტუმრების საბოლოო სიას, როგორც წესი ქორწილის ცერემონიის დაწყებამდე არ ასაჯაროებენ. 18 მაისს ცნობილი გახდა, რომ ტრადიციის წინააღმდეგ პატარძალს საკურთხეველთან საქმროს მამა, პრინცი ჩარლზი მიიყვანს. მეგანის მამამ, თომას მარკლმა ბოლო მომენტში განაცხადა, რომ ქორწილს ახლახან გადატანილი გულის ოპერაციის გამო ვერ დაესწრება. თუმცა არსებობს ეჭვი, რომ საქმე ჯანმრთელობაში არ არის.

თავდაპირველად დაგეგმილი იყო, რომ თომას მარკლი დიდ ბრიტანეთში მექსიკიდან ჩავიდოდა. ქორწილამდე ერთი კვირით ადრე გაირკვა, რომ მეგანის მამის ფოტოები, რომლებიც თითქოს პაპარაცებმა გადაიღეს, სინამდვილეში დადგმულია. ამ ფოტოებზე, რომლებიც ტაბლოიდებმა მთელი მსოფლიოს მასშტაბით გამოაქვეყნეს, თომას მარკლი მექსიკის მშობლიურ ქალაქ როსარიტოში, Starbucks-ის კაფეში ათვალიერებს ფოტოალბომს დიდი ბრიტანეთის ხედებით, ცდილობს კოსტუმის მორგებას და ადგილობრივ ინტერნეტ-კაფეში, კომპიუტერის მონიტორზე უყურებს თავისი შვილის და პრინც ჰარის ერთად გადაღებულ ფოტოებს.

მამის გარდა, ქორწილს არ დაესწრება მარკლის ნახევარდა სამანტა. ის თომას მარკლის შვილია პირველი ქორწინებიდან, ცხოვრობს ფლორიდაში სამ შვილთან ერთად და გადაადგილდება ინვალიდის ეტლით, რადგან გაფანტული სკლეროზით არის დაავადებული. მეგანთან მას ურთიერთობა ბევრი წელია აღარ აქვს. როდესაც მეგანის და ჰარის რომანი ახალი დაწყებული იყო სამანტა პრესას ინტერვიუებს აძლევდა, თავის დას აკრიტიკებდა, მას „ზედაპირულ მდაბიოს“ უწოდებდა, ამბობდა, რომ პრინცთან მისი ურთიერთობები სავარაუდოდ არასერიოზული იყო და იმუქრებოდა, რომ „მდაბიო პრინცესის დის დღიურებს“ გამოსცემდა. 2018 წლის დასაწყისში სამანტამ ტონი შეცვალა და განაცხადა, რომ ოჯახი ოჯახად რჩება მიუხედავად იმისა, რომ მისი წევრები დიდი ხანია აღარ კონტაქტობენ. გარდა ამისა, ქორწილამდე ერთი კვირით ადრე სამანტამ აღიარა, რომ სწორედ მან დაარწმუნა მამამისი დადგმული ფოტოები გადაეღო, რადგან მიაჩნდა, რომ ეს გააუმჯობესებდა თომას მარკლის იმიჯს საზოგადოების თვალში.

სტუმრების სიაში არ არის თომას მარკლის მეორე შვილი პირველი ქორწინებიდან, 50 წლის უმცროსი თომას მარკლი. ნახევარდას ისიც წლების განმავლობაში არ ეკონტაქტებოდა. მაისის დასაწყისში მან გამოცემა In Touch-ს გაუზიარა პრინც ჰარისთვის გაგზავნილი წერილი, რომელშიც ის ჰარის არწმუნებს უარი თქვას მეგანთან დაქორწინებაზე „ვიდრე გვიანი არ არის“, რადგან „სამეფო ქორწილების ისტორიაში ეს უდიდესი შეცდომა“ იქნება. მალევე მან ინანა თავისი საქციელის გამო და მეგანს ქორწილის მოსაწვევი სთხოვა. 

ქორწილზე პრინც ჰარის ზოგიერთი შორეული ნათესავიც არ დაპატიჟეს, რაც გასაკვირი არ არის, რადგან ცერემონიზე უილიამის ქორწილთან (2011 წელი) შედარებით სამჯერ ნაკლები სტუმარი იქნება.

გარდა ამისა, კენსინგტონის სასახლემ თავიდანვე განაცხადა, რომ წყვილი არ მიიწვევს ცერემონიაზე პოლიტიკოსებს. სწორედ ამიტომ არ იქნებიან ქორწილში არც ტერეზა მეი და არც დონალდ ტრამპი. ცერემონიას არ დაესწრებიან არც ბარაკ ობამა და მიშელ ობამა, მიუხედავად იმისა, რომ წყვილს ძალიან კარგი ურთიერთობა აქვს პრინც ჰარისთან. განსხვავებით უილიამისა და ქეით მიდლტონისაგან, ჰარიმ და მეგან მარკლმა ქორწილში ევროპული სამეფო დინასტიების წარმომადგენლებიც არ დაპატიჟეს.

პრინცის მხრიდან, ნათესავების გარდა ქორწილში იქნებიან ჰარის ახლო მეგობრები, მაგალითად პრინცი ლესოტო სეისო (მასთან ერთად ჰარი საქველმოქმედო პროექტებზე მუშაობს ლესოტოსა და ბოტსვანაში), ასევე ისინი, ვისთან ერთადაც პრინცი ავღანეთში მსახურობდა. მოსაწვევები მიიღეს მოდელმა და მსახიობმა კარა დელევინმა, რომელთანაც ჰარი ბევრი წლის განმავლობაში მეგობრობს და მომღერალმა ელი გოლდინგმა, რომელიც უილიამის ქორწილში მღეროდა.

ქორწილში მიწვეულები არიან ჰარის ყოფილი მეგობარი გოგოები: კრესიდა ბონასი, რომელთანაც პრინცი დღემდე მეგობრობს და ჩელსი დევი - ჰარი მას 7 წლის განმავლობაში ხვდებოდა. სავარაუდოდ, ცერემონიაზე დაუკრავს ელტონ ჯონი, რომელიც ჰარის დედის, პრინცესა დიანას მეგობარი იყო; ამ დღისთვის მან სპეციალურად გააუქმა კონცერტი ლას-ვეგასში.

მეგანის მხრიდან ცერემონიაზე დაპატიჟებულები არიან მისი კოლეგები სერიალიდან „Suits“, ასევე მისი მეგობრები - ინდოელი მსახიობი პრიანკა ჩოპრა, ჩოგბურთელი სერენა უილიამსი და სტილისტი ჯესიკა მალრუნი, რომელიც, სავარაუდოდ, მეგანს ქორწილის ორგანიზებაში ეხმარებოდა. კენსინგტონის სასახლის ინფორმაციით, მეგანმა უარი თქვა მეჯვარეზე, რადგან ყველა მეგობართან ძალიან კარგი ურთიერთობა აქვს და მათგან არავინ გამოარჩია.