ამერიკელი უსახლკარო, რომლისთვისაც წყვილმა $400 000 შეაგროვა, ისევ ქუჩაში ცხოვრობს

ამერიკელმა ქეით მაკკლიურიმ უსახლკარო ჯონი ბობიტისთვის სახლის შესაძენად 400 000 დოლარამდე შეაგროვა, თუმცა უსახლკარო ბობიტი დღეს ისევ ქუჩაში, ხიდის ქვეშ ცხოვრობს. მის შესახებ სტატია The Philadelphia Inquirer-მა მოამზადა.

გამოცემის ცნობით, ყველაფერი გასული წლის ნოემბერში დაიწყო, როდესაც ბობიტი ქეით მაკკლიურის უკანასკნელი 20 დოლარით დაეხმარა და საწვავი უყიდა, რათა შუა გზაზე გაჩერებულ ქეითს გზის გაგრძელება შესძლებოდა (ამ უკანასკნელს ფული თან არ ჰქონდა). რამდენიმე დღის შემდეგ მაკკლიური ბობიტისთან დაბრუნდა და მას ცოტაოდენი ფული და თბილი ტანსაცმელი მისცა. ქეით მაკკლიური უსახლკარო ჯონთან კიდევ რამდენჯერმე მივიდა და ბოლოს გადაწყვიტა, რომ მისთვის ფული შეეგროვებინა და სახლი ეყიდა. 

ამ მიზნით, საქველმოქმედო აქცია GoFundMe-ზე დაიწყო. მას ფულის შეგროვებაში მეგობარი ბიჭიც ეხმარებოდა. მათ სულ 10 000 დოლარის მოგროვება უნდოდათ, თუმცა უკვე დეკემბერში უსახლკარო ჯონი ბობიტის დასახმარებლად 300 000 დოლარამდე შეგროვდა. სწორედ მაშინ ქეითმა და მისმა მეგობარმა ბიჭმა გადაწყვიტეს, რომ საბოლოო მიზანი შეეცვალათ და ბობიტისთვის საოცნებო მანქანა, 1999 წლის Ford Ranger-ი ეყიდათ, დარჩენილი თანხა კი ორ ანგარიშზე გადაერიცხათ, რათა ბობიტისთვის უზრუნველყოფილი ცხოვრება შეექმნათ - სწორედ ასე დაწერა წყვილმა ფულის შეგროვების მიზნის შესახებ ვებგვერდზე განახლებულ ინფორმაციაში.

მაკკლიურის თქმით, ეს გეგმა თავად ჯონი ბობიტმა იურისტთან და ფინანსურ კონსულტანთან ერთად შეიმუშავა. ბობიტი კი ამბობს, რომ არასდროს, არანაირ იურისტს არ შეხვედრია და ამასთან, მისთვის არც სახლი უყიდიათ და არც მანქანა. გამოცემის ცნობით, უსახლკარო ჯონთან წყვილი ბორბლებიანი საცხოვრებელი ფურგონით მივიდა და ერთიც პიკაპი მიუყვანეს, ეს ორივე კი სხვის სახელზე იყო ნაყიდი. 

ქეით მაკკლიური ირწმუნება, რომ თავიდან ბობიტს თანხის სრული განკარგვის შესაძლებლობა მისცეს, თუმცა ის ფულს ნარკოტიკებში ხარჯავდა. ბობიტი აღიარებს, რომ ნარკოდამოკიდებულია და მართლაც შეიძინა ნარკოტიკული საშუალება, თუმცა დასძენს, რომ ამისთვის მან საშუალოდ დღეში 15 დოლარი დახარჯა. ხოლო 25 ათასი დოლარი, რომელიც წყვილმა მას ერთხელ მისცა, ოჯახის წევრებსა და ახლობლებს გაუგზავნა. 

მაკკლიურის მეგობარი ბიჭის დამიკოს თქმით, საცხოვრებელი ფურგონი და პიკაპი ბობიტის მოთხოვნით გაყიდეს, რადგან მას ნიუჯერსიდან სურდა წასვლა. ბობიტის თქმით კი მაქანების გაყიდვის შემდეგ, დამიკომ მისთვის ფულის მიცემაზე უარი თქვა და უთხრა, რომ ნარკოდამოკიდებულებისგან გათავისუფლებისა და სამუშაოს მოძებნის შემთხვევში მისცემდა თანხას.

ბობიტი დასძენს, რომ დამიკო აზარტულ თამაშებზეა დამოკიდებული, რასაც ის აღიარებს და ამბობს, რომ მხოლოდ ერთხელ ითამაშა უსახლკარო ჯონისთვის შეგროვებული ფულით და 500 დოლარი დახარჯა. 

ბობიტისა და დამიკოს თქმით, შეგროვებული თანხიდან დღესდღეისობით 200 ათასს დოლარამდეა დარჩენილი. ურთიერთბრალდებების ფონზე, თუ ვინ და როგორ ხარჯავს ფულს, ბობიტი ამბობს, რომ ურჩევნია ქუჩაში იცხოვრობს და იმათხოვროს საჭმლისა და ნარკოტიკების ფული, ვიდრე ელოდოს დამიკოსა და მაკკლიურის დახმარებას.