ირაკლი ღარიბაშვილი: ჯარი დაკომპლექტდება უახლესი ამერიკული შაშხანებით, ტყვიამფრქვევებით, ყუმბარმტყორცნებით

როგორი ფეხსაცმელიც აცვია გერმანულ, ბრიტანულ, ფრანგულ ჯარს, იგივე ფეხსაცმელი აცვია დღეს ქართულ ჯარს, - ამის შესახებ ირაკლი ღარიბაშვილმა „იმედის“ გადაცემაში „არენა“ განაცხადა. თავდაცვის მინისტრმა იმ პროექტებზე ისაუბრა, რომლებიც სამინისტრომ ჯარისკაცების ეკიპირების და ინფრასტრუქტურის სფეროებში განახორციელა. მისივე თქმით, სამინისტროს ყველა ბაზაზე თანაბრად მაღალი სტანდარტია დაცული.

„შთაგონება სწორედ ამერიკული ბაზებიდან ავიღე პირადად, ვინაიდან ნებისმიერ ქვეყანაში რომ ჩახვიდეთ, სამხედრო ბაზები არის ერთი სტილის, ერთი სტანდარტით. რეალურად ეს ჩვენთვის არის საუკეთესო პრაქტიკა, საუკეთესო გამოცდილება და სწორედ ამ მიმართულებით წავედით“, - განაცხადა ღარიბაშვილმა.

მან მახათის მთაზე სამხედრო ქალაქის მშენებლობაზეც ისაუბრა, რომლის ფარგლებში 1000 ბინა აშენდება და აღნიშნა, რომ უწყებას პროგრესი შეიარაღების სფეროშიც აქვს.

„2021 წელს ჩვენ გვექნება სრულად განახლებული ჰაერსაწინააღმდეგო სისტემები. ჩვენ დამატებით შევისყიდეთ თანამედროვე შეიარაღების სისტემები ამერიკიდან. ავითვისეთ 30 მილიონ დოლარიანი გრანტი, რომელიც მანამდე 2007 წლიდან მოყოლებული ინახებოდა და როგორც მე ვამბობ გეგმებში, ჩემს ანგარიშშიც ეს ვთქვი, განსაკუთრებული აქცენტი მექნება გადატანილი საბრძოლო მზადყოფნაზე და შეიარაღებაზე. ვგეგმავთ თანამედროვე სისტემების შესყიდვას, როგორიც არის, მაგალითად, გადასატანი ჰაერსაწინააღმდეგო სისტემები, ასევე ათობით დრონის შეძენას ვგეგმავთ, როგორც ოპერატიული, ასევე ტაქტიკური ანუ საბრძოლო. მთელი ჯარი დაკომპლექტდება უახლესი ამერიკული შაშხანებით, ტყვიამფრქვევებით, ყუმბარმტყორცნებით“, - განაცხადა მინისტრმა.