გიორგი მათიაშვილი: თავდაცვის ძლების წარმატება ჯარისკაცზე ზრუნვისა და ინსტიტუციურ განვითარებაზე ფოკუსირებულმა რეფორმებმა განაპირობა

თავდაცვის ძლების წარმატება განაპირობა განხორციელებულმა რეფორმებმა, რომელიც ჯარისკაცზე ზრუნვისა და ინსტიტუციურ განვითარებაზე იყო ფოკუსირებული, - ამის შესახებ საქართველოს თავდაცვის ძალების მეთაურმა, გენერალ-მაიორმა, გიორგი მათიაშვილმა თავდაცვის ძალების 30 წლისადმი მიძღვნილ ღონისძიებაზე განაცხადა.

მან საზოგადოებას დღევანდელი დღე მიულოცა და თავდაცვის ძალების მიერ განვლილ რთულ და გამოწვევებით სავსე გზის შესახებ ისაუბრა. მისი თქმით, საქართველოს თავდაცვის ძალები სირთულეების მიუხედავად ვითარდებოდა და წარმატებას აღწევდა, როგორც ქვეყნის შიგნით, ასევე საერთაშორისო ასპარეზზე.

„ძლიერი ჯარისკაცი, მართვის ეფექტური სისტემა თავდაცვის ძლების წარმატების ქვაკუთხედია. თავდაცვის ძლების წარმატება განაპირობა განხორციელებულმა რეფორმებმა, რომელიც ჯარისკაცზე ზრუნვაზე იყო ფოკუსირებული და ინსტიტუციურ განვითარებაზე. რეფორმების ფარგლებში მნიშვნელოვნად გაუმჯობესდა სამხედრო მოსამსახურეების სოციალ-ეკონომიკური მდგომარეობა, განახლდა თავდაცვის ძალების საავტომობილო პარკი, შეძენილია სხვადასხვა სახის სამხედრო შეიარაღება. აქტიურად მიმდინარეობს „ჯაველინის პროგრამის“ განხორციელება. ეტაპობრივად ვითარდება ეროვნული წარმოება და უმჯობესდება ჯარისკაცების სამხედრო აღჭურვილობა“, - განაცხადა გენერალ-მაიორმა.

მისი თქმით, აღნიშნული ცვლილებები საბჭოთა ტექნიკის ჩასანაცვლებლად და ნატოს სტანდარტების დასანერგადაა მიმართული.

„დღეს ჩვენ ყველანი იმით ვამაყობთ, რომ ქართველ ჯარისკაცს დამსახურებულად უჭირავს ადგილი საერთაშორისო პარტნიორებს შორის როგორც სამხედრო ოპერაციებში, ასევე საერთაშორისო სწავლებებში. აქვე მინდა აღვნიშნო, რომ თავდაცვის ძალების ისტორიის მანძილზე ყველაზე ხანგრძლივი, 17-წლიანი სამშვიდობო მისია დასასრულს უახლოვდება და ალიანსის სხვა ქვეყნებთან ერთად მიმდინარეობს ავღანეთის ისლამური რესპუბლიკიდან ქვედანაყოფების გამოყვანის პროცესი“, - განაცხადა თავდაცვის ძალების მეთაურმა.

მისივე თმით, საქართველოს თავდაცვის ძალები გლობალური უსაფრთხოების უზრუნველყოფის განუყოფელი მონაწილეა და ნატოსა და ევროკავშირის ეგიდით მიმდინარე სამშვიდობო ოპერაციებში მონაწილეობს.

„გარდა სამშვიდობო მისიებისა საქართველოს თავდაცვის ძალები ნატოსთან სხვა მიმართულებითაც აქტიურად თანამშრომლობს. მინდა გამოვყო ნათო-საქართველოს თანამშრომლობის არსებითი პაკეტი, რომელიც სხვადასხვა მიმართულებით თავდაცვის ძალების განვითარებასა და ნატოსთან თავსებადობის ამაღლებას ემსახურება“, - განაცხადა გიორგი მათიაშვილმა.

მისი თქმით, თავდაცვის ძალები თანამშრომლობს ორმხრივ ფორმატებშიც. მან ამ კუთხით მან ხაზი გაუსვა აშშ-თან თანამშრომლობას.

„ჩვენი ორმხრივი თანამშრომლობის მაგალითია საქართველო თავდაცვის ძლების მზადყოფნის პროგრამა, რომლის ფარგლებშიც ამ ეტაპისთვის სრულად მომზადდა 8 საბრძოლო-სამანევრო ბატალიონი. შედეგად საქართველოს თავდაცვის ძალებმა უნდა შეძლოს ქვეყნის წინაშე არსებულ შესაძლო საფრთხეებსა და გამოწვევებზე ადეკვატური რეაგირება. ამიტომაც, განსაკუთრებულ ყურადღებას ვუთმობთ, საბრძოლო პროცესის მომზადების გაუმჯობესებას; ამოცანაზე ორიენტირებული წვრთნების ჩატარებას და თვითშეფასების ეფექტური პროცესის დანერგვას“, - განაცხადა გენერალ-მაიორმა.

ამასთან, მან მადლიერება გამოხატა ყველა იმ ადამიანის მიმართ, ვინც მხარს უჭერს თავდაცვის ძლების პრიორიტეტების აღსრულებას. კერძოდ, მადლობა გადაუხადა ხელისუფლებას, ამერიკელ პარტნიორებსა და ასევე ყველა სამხედრო პირს თავდაცვის ძალების განვითარების პროცესში მონაწილეობისა და გაწეული წვლილისთვის.