ჯუანშერ ბურჭულაძე: პარტნიორებმა ჩვენ აღგვითქვეს სრული მხარდაჭერა, ყველა იაზრებს, რომ საქართველო არის რეგიონში ძალიან მნიშვნელოვანი პარტნიორი

პარტნიორებმა ჩვენ აღგვითქვეს სრული მხარდაჭერა. არ არის რომელიმე კომპონენტი, რომელშიც საქართველო არ იმსახურებდეს ცივილურ სამყაროში ინტეგრაციას. არამარტო ჩვენ, არამედ ყველა პარტნიორი სახელმწიფო, მინისტერიალის ფარგლებში აღნიშნავს, რომ საქართველოს სჭირდება მეტი მხარდაჭერა, მეტი დახმარება და კონკრეტული ნაბიჯების გადადგმა, - ამის შესახებ საქართველოს თავდაცვის მინისტრმა, ჯუანშერ ბურჭულაძემ ბრიუსელში ჟურნალისტებს განუცხადა.

მისივე თქმით, გენერალურმა მდივანმა რეგიონში არსებული გამოწვევების შესახებ საქართველოს ხედვა გაიზიარა.

„დავგეგმეთ, რომ კიდევ უფრო მჭიდრო ურთიერთობა გვექნება ნატოსთან, გავაკეთებთ განახლებებს ინფორმაციის, ჩვენი სადაზვერვო სამსახურები მჭიდროდ თანამშრომლობენ ჩვენს პარტნიორებთან და ყველა იაზრებს, რომ საქართველო არის რეგიონში ძალიან მნიშვნელოვანი პარტნიორი. სულისკვეთება მოგეხსენებათ რაც არის, ე.წ. რამშტაინის ფორმატის. შეხვედრაზე განვიხილეთ ის, თუ რა დახმარებაა უკვე აღმოჩენილი პარტნიორების მიერ უკრაინისთვის, თუ რა მზაობა არსებობს უკრაინისთვის მხარდაჭერის ომის დროს და ამ ძალისხმევის გაძლიერების. კიდევ ერთხელ ხაზს ვუსვამ, მიუხედავად იმისა, რომ ჩვენ სამხედრო შეიარაღებით, სამწუხაროდ, ვერ ვეხმარებით უკრაინელებს, მაინც ვიყავით მოწვეული ამ ფორმატში და ეს კიდევ ერთი ხაზგასმაა, რომ საქართველო ცივილური სამყაროს განუყოფელი ნაწილია“, - განაცხადა თავდაცვის მინისტრმა.