ჯუანშერ ბურჭულაძე: რადიკალურად გამორჩეული ტელევიზიები ჯარის დისკრედიტაციას ეწევიან. ამას რეაგირების გარეშე არ დავტოვებთ

ჯუანშერ ბურჭულაძის თქმით, მისი უწყება რეაგირების გარეშე ვერ დატოვებს ჯარის დისკრედიტაციის მცდელობებს. ამის შესახებ თავდაცვის მინისტრმა მთავრობის სხდომის შემდეგ გამართულ ბრიფინგზე განაცხადა. მან აღნიშნა, რომ დეზინფორმაცია ვრცელდება ჯარიდან გადინებისა და ჯარისკაცების ფორმების ხარისხთან დაკავშირებით.

„ჯარის, ჩვენთან მიმდინარე რეფორმების დისკრედიტაციის რეაგირების გარეშე არ დავტოვებთ. რადიკალურად გამორჩეულ ტელევიზიებს ბოლო ერთი თვის განმავლობაში სხვა საქმე აღარ აქვთ და ყველაზე ავტორიტეტული ინსტიტუციის, ჯარის დისკრედიტაციას ეწევიან. მინდა გამოვეხმაურო ორ საკითხს: ერთი არის ჯარიდან გადინების საკითხი, მეორე კი ჩვენი წარმოების მიერ დამზადებული პროდუქციის ხარისხს ეხება.

წელს 1 600 ადამიანი დაემატა საკონტრაქტოზე ჯარს. ეს არსებითად მაღალი მაჩვენებელია იმ რეკორდულ ციფრებთან მიმართებითაც კი, რაც დეკადების განმავლობაში ყოფილა. 1 600 ადამიანი მოვიდა და ზუსტად იმიტომ დაინტერესდა, რომ მათ იციან, როგორ ზრუნავს ჩვენი ხელისუფლება ჯარისკაცებზე, რა სოციალური და სხვა პირობები გვაქვს შექმნილი თავდაცვის უწყებაში. ასეთი ტენდენცია, შედეგი თავდაცვის სამინისტროს არ ჰქონია, განსაკუთრებით ბოლო წლების განმავლობაში. ჩვენ ოთხი წლის წინ, ირაკლი ღარიბაშვილის მინისტრობის დროს დავიწყეთ თავდაცვის სამინისტროზე განსაკუთრებულად ზრუნვა. რა თქმა უნდა, ეს პროცესი გრძელდება და სწორედ ამის შედეგია ის, რაც აღვნიშნე.

ასევე აბსურდული ბრალდებაა „ტექსტილის“ ხარისხთან დაკავშირებით. 50-ზე მეტი დასახელების საქონელი არის მოწოდებული და შექმნილი „დელტა ტექსტილის მიერ“. რა ხდებოდა აქამდე? 50 დასახელების საქონლიდან 20-ის მიღება გვიჭირდა, დანარჩენს კი, ხშირ შემთხვევაში, უხარისხოს ვიღებდით. ქსოვილთან დაკავშირებით ვითხოვდით მხოლოდ ლაბორატორიას და საბოლოო ჯამში, ეს ხარისხის გარანტი არ იყო.

ამ მიმართულებით რა შედეგი გვაქვს, ყველაზე მარტივად დასანახია აღლუმებზე. ნებისმიერი წელი აიღეთ, არ ვგულისხმობ ბოლო ორ და სამ წელს, ნახეთ, აღლუმებზე როგორ უნიფორმებში დგანან ჩვენი სამხედროები. ასევე ნახეთ, განსაკუთრებით წინა ხელისუფლების პერიოდში, რა ფეხსაცმელი ეცვათ – გახუნებული ფეხსაცმელი, რომელსაც ძირი ძვრებოდა, ტანსაცმელი, რომელიც ერთ გარეცხვაში იყო გაცვეთილი. ბოდიში, მაგრამ ეს იყო შეურაცხმყოფელი დამოკიდებულება ჩვენი ჯარისკაცების მიმართ. ახლა ნახეთ, როგორია ჩვენი ჯარისკაცების უნიფორმა, ჩაცმულობა. ასევე, მინდა, საზოგადოებას ვუთხრა, რომ ეს ძალიან ცოცხალი პროცესია. იცვლება ყოველდღიური, სააღლუმე ფორმები. კარვების, ზურგჩანთების და ყველა საგნის პრაქტიკაში ტესტირება გაცილებით დიდ შედეგს გვაძლევს. საბედნიეროდ, არის ობიექტური მედიასაშუალებები, რომლებმაც გააშუქეს და კომენტარებს აკეთებდნენ თავდაცვის ძალების სამხედრო მოსამსახურეები იმის შესახებ, რა იყო და რა გვაქვს დღეს“, - განაცხადა მინისტრმა.

მან ასევე აღნიშნა, რომ ასევე ვრცელდებოდა არასწორი ინფორმაცია თავდაცვის უწყებიდან დათხოვნილ თანამშრომლებთან დაკავშირებით და ამასაც „აბსურდი“ უწოდა.