კვლევა: ყოველ მეოთხე ამერიკელს სექსი არ აქვს

იმატებს ზრდასრული ამერიკელების წილი, რომლებსაც რამდენიმე თვის და წლის განმავლობაში სექსი არ აქვთ. ასეთია აშშ-ის საზოგადოებრივი აზრის კვლევითი ცენტრის ბოლო სამი ათწლეულის მონაცემების სტატისტიკა, რომლის წარმოებაც ცენტრმა 1988 წლიდან დაიწყო. 

კვლევის შედეგების მიხედვით, 2018 წელს ყოველ მეოთხე ამერიკელს (დაახ. 25%) ერთი სექსუალური პარტნიორიც არ ჰყოლია, ხოლო გამოკითხულთა 15%-ს ბოლო 5 წლის განმავლობაში სექსი არ ჰქონია. მათი თქმით, ეს მაჩვენებელი რეკორდულია.

სექსუალური აქტივობის შემცირების ერთ-ერთი მიზეზი ერის დაბერების მაჩვენებელია: „ბეიბი ბუმის" თაობა, რომელიც 1946-1964 წლებში დაიბადა, ბუნებრივი მიზეზების გამო სექსით აღარ კავდება. თუმცა, მეცნიერების გაკვირვება ახალგაზრდების 23 პროცენტის პასუხმა გამოიწვია, რომლებმაც თქვეს, რომ სექსუალური კავშირი არასდროს ჰქონიათ. 

მიიჩნეოდა, რომ მილენიალები (ისინი ვინც 1981 წლის შემდეგ დაიბადა), სექსუალურად აქტიური სოციალური ჯგუფი იყო, თუმცა ბოლო კვლევამ ეს არ დაამტკიცა. ექსპერტები ამბობენ, რომ ამერიკელები მთლიანობაში უფრო ნელა იზრდებიან და გვიან იწყებენ ზრდასრული ცხოვრებით ცხოვრებას. „ძალიან ბევრი 20 და 30 წლის ადამიანი ისევ მშობელთან განაგრძობს ცხოვრებას და შესაბამისად, ასეთ პირობებში მათ უფრო ნაკლებად აქვთ სექსი“, - განმარტავს ფსიქოლოგი ჯეინ ტვენჯი. 

30-დან 40 წლამდე ამერიკელებში უსექსობის შესახებ რესპონდენტების 7%-მა ილაპარაკა. 40-დან 50 წლამდე კატეგორიაში მაჩვენებელი 9% იყო, ხოლო 50-60 წლისებიდან 13%-მა თქვა, რომ ბოლო პერიოდში სექსი საერთოდ არ ჰქონია.