ინტერვიუ ლინდა ლიუკასთან, რომლის წიგნითაც ქართველმა ბავშვებმა პროგრამირება უნდა ისწავლონ

სექტემბრიდან დაწყებითი კლასის მოსწავლეები საქართველოში წიგნით „გამარჯობა, რუბი“ პროგრამირებას და კომპიუტერულ მეცნიერებას ისწავლიან.

„თავგადასავალი პროგრამირების სამყაროში“ და „მოგზაურობა კომპიუტერში“ სახელმძღვანელოდ სამ საჯარო და ორ კერძო სკოლაში შევა. ლაპარაკია თბილისის 71-ე, რუსთავის მე-4, საგარეჯოს მე-2 საჯარო სკოლებზე, ასევე “ბაქსვუდისა“ და „21-ე საუკუნე“ კერძო საგანმანათლებლო დაწესებულებებზე, სადაც სწავლება კლუბების სახით დაინერგება. 

"იმედის კვირამ" კრეატიული სახელმძღვანელოს ავტორთან, პროგრამისტთან ლინდა ლიუკასთან ინტერვიუ ჩაწერა. როგორც ლინდა ლიუკასი ამბობს, მისთვის ბავშვობაში კომპიუტერი ჯადოსნური, ფერადი ყუთი და აღმაფრენის წყარო იყო, პროგრამირების შესახებ წიგნები კი მოსაწყენი და რთული.

"იქ მანქანებსა და ლოგიკაზე იყო საუბარი. რჩებოდა შთაბეჭდილება, რომ ეს მხოლოდ კაპიშუნიანი ბიჭების საქმე იყო. ამიტომ, წიგნზე მუშაობისას ვცდილობდი წარმომედგინა, როგორ გაიგებდა 5 წლის გოგო კონცეფციას და პროგრამირებას. ასე დაიბადა რუბი, გმირი, რომელიც კომპიუტერულ მეცნიერებას მოსწავლისთვის კიდევ უფრო ხელმისაწვდომს ხდის", - თქვა ლინდა ლიუკასმა.

ავტორისა და პროგრამისტის თქმით, წიგნის იდეაც და ჩანახატებიც 5 წლის წინ გაჩნდა, პროექტი კი საზოგადოებრივ პლატფორმა „კიკსტარტერზე“ განათავსა.

"ავტვირთე ვიდეოც და  სამყაროს ვუთხარი, რომ პროგრამული უზრუნველყოფის განვითარებისთვის ახალი გმირი გვჭირდებოდა. რამდენიმე დღეში 10 ათასზე მეტი წერილი მივიღე და თითქმის 400 ათასი დოლარი შევაგროვე. წიგნი 26 ენაზე უკვე გამოიცა", - ამბობს პროგრამისტი.

ლინდას თქმით, ყველაზე მნიშვნელოვანია, რომ კომპიუტერული მეცნიერება ახალი თაობისთვის გასაგები და ხელმისაწვდომი იყოს.

"მინდა ბავშვებს თავდაუზოგავი შრომა და მონდომება ვასწავლო. პროგრამირების დახვეწა უწყვეტი ვარჯიშით, პრაქტიკით და უამრავი შეცდომის ხარჯზე შეიძლება. ის მხოლოდ მეხსიერების ვარჯიში, ლოგიკა და მათემატიკა არაა. ჩვენს სამყაროში სულ უფრო მეტი პრობლემაა, რომლის გადასაჭრელად ადამიანებისა და კომპიუტერების ერთობლივი მუშაობაა საჭირო. სწორედ, ამიტომ გვჭირდება სხვადასხვა მიმართულების სულ უფრო მეტი პროგრამისტი პრობლემების გადაჭრის უნარებით", - ამბობს წიგნის ავტორი.

ლინდა ლიუკასის თქმით, ეს წიგნი სხვა წიგნებისგან იმით განსხვავდება, რომ ბავშვები სწავლობენ, რომ კომპიუტერს კონკრეტული ბრძანება უნდა მისცენ და დიდი პრობლემის მიღმა მცირეც შეამჩნიონ.

"განსხვავება მართლაც დიდია. მაგალითად, 6 წლის რუბის ოთახი არეულია და გაიცა ბრძანება, რომ სათამაშოები თავის ადგილზე დააბრუნოს. რუბი ოთახს ალაგებს, მაგრამ იატაკზე ტოვებს კალმებს და ფურცლებს. ამით ბავშვები სწავლობენ, რომ კომპიუტერს, კონკრეტული ბრძანება უნდა მისცენ და დიდი პრობლემის მიღმა მცირეც შეამჩნიონ. პროგრამირებაში  უამრავი მასალაა და ნებისმიერს შეუძლია მისი გაცნობა, ჩემი წიგნი მათ აცნობს კომპიუტერს,  მანქანას, რომელსაც ასეთი დიდი გავლენა აქვს ჩვენს სამყაროზე და ასწავლის, როგორ ჩააყენონ ის საკუთარ სამსახურში  სწორი ბრძანებებით.  კომპიუტერით მათი თვითგამოხატვა და პრობლემების გადაჭრაა შესაძლებელია", - ამბობს ლინდა ლიუკასი.

"იმედი მაქვს,  20 წლის შემდეგ, როდესაც აქ ისევ ჩამოვალ გოგონებისა და ბიჭების ეს თაობა, რომელსაც ინტელექტუალური ცნობისმოყვარეობა და  კომპიუტერისადმი უშიშარი დამოკიდებულება ექნება, თავისუფლად გადაჭრის რთულ პრობლემებს. ვიმედოვნებ, ჩემი წიგნი მათ ამაში დაეხმარება", - თქვა ინტერვიუს დროს ლინდა ლიუკასმა.