ბრიტანელი პროფესორი: დასაოჯახებელი უშვილო ქალები ყველაზე ბედნიერები არიან

ლონდონის ეკონომიკის სკოლის პროფესორის, პოლ დოლანის განცხადებით, ქალები, რომლებიც დაუქორწინებლები არიან და შვილი არ ჰყავთ, მოსახლეობაში ყველაზე ბედნიერები არიან. 

როგორც The Insider-ი წერს, დოლანის თქმით, ქალებისგან განსხვავებით, კაცები დაოჯახების შემთხვევაში მეტ სარგებელს იღებენ.  "ნაკლებად რისკავ, სამსახურში მეტ ფულს გამოიმუშავებ და მეტ ხანსაც ცოცხლობ. ქალებმა კი ეს უნდა აიტანონ. ყველაზე ბედნიერები და ჯანმრთელები ის ქალები არიან, რომლებიც არასდროს დაქორწინებულან და არასდროს ჰყოლიათ შვილები", - აცხადებს პოლ დოლანი. 

დოლანს წიგნში Happy Ever After კვლევის შედეგები აქვს მოყვანილი, რომლის მიხედვითაც დაქორწინებულების შემთხვევაში დაუქორწინებლებთან შედარებით ბედნიერების დონე მაშინ უფრო მაღალი იყო, როცა მათი პარტნიორი მათთან ერთად იმყოფებოდა. ხოლო დაუქორწინებლები ბევრად ბედნიერები იყვნენ ვიდრე დაქორწინებულები მაშინ, როდესაც მათ გვერდით პარტნიორი არ იყო.

პროფესორი პოლ დოლანი ამბობს, რომ საზოგადოებაში არსებული სტიგმა იმის შესახებ, რომ ქორწინება და შვილების ყოლა წარმატებასთან ასოცირდება, ზოგიერთ მარტოხელა ქალს თავს უბედურად აგრძნობინებს. "ხედავ 40 წლის მარტოხელა ქალს, რომელსაც შვილი არასდროს ჰყოლია. ეტყვიან "ეს სირცხვილია, არა? იქნებ ერთ დღეს შეხვდე შესაფერის კაცს და ყველაფერი შეიცვლება." არა, იქნებ ის ისეთ კაცს შეხვდეს, რომელიც თავს ნაკლებად ბედნიერად აგრძნობინებს", - ამბობს დოლანი.  

მისივე თქმით, ბავშვების ყოლა "საოცარი გამოცდილებაა", თუმცა არიან ადამიანები, ვისთვისაც ასე არაა და ის, რომ საზოგადოებას ამაზე ღიად საუბარი არ შეუძლია, პრობლემას წარმოადგენს.