აუტიზმსა და ვაქცინაციას შორის კავშირი კიდევ ერთმა კვლევამ უარყო

აუტიზმსა და ვაქცინაციას შორის კავშირი არ არსებობს. ამის შესახებ დანიაში ჩატარებულ კვლევაში წერია, რომელშიც 1999-2010 წლებში დაბადებული 650,000 ბავშვი მონაწილეობდა. ინფორმაციას Business Insider-ი ავრცელებს.

ეს საკითხი სამეცნიერო და სამედიცინო წრეებში ბოლო 20 წლის განმავლობაში საკმაოდ აქტუალურია. ამაზე რამდენიმე სტატიაც დაიწერა. თუმცა, ამ მასშტაბის კვლევა ფაქტობრივად არ ჩატარებულა. 

მოსაზრება, რომ აუტიზმსა და ვაქცინაციას შორის კავშირი არსებობს საკმაოდ გავრცელებულია. სწორედ ამის გამო, შემცირდა იმ მშობელთა რაოდენობა, რომლებიც თავის შვილებს აცრებს უტარებენ. თეორიას, რომ აცრა იწვევს აუტისტური სპექტრის აშლილობას,  ბევრი მომხრე და მოწინააღმდეგეც ჰყავს. ყველაფერი კი ენდრიუ უეკფილდის ნაშრომით დაიწყო, რომელშიც ნათქვამია, რომ ვაქცინაცია ბავშვებში აუტიზმს იწვევს. საბოლოოდ, ბრიტანეთის სამედიცინო საბჭომ უეკფილდს უფლებამოსილება შეუწყვიტა.

2001 წლიდან 2003 წლამდე ვაქცინის გამოყენება 80%-ით შემცირდა, რასაც მოჰყვა დაავადების გავრცელება. განსაკუთრებით გავრცელდა წითელა, რადგან ის კონტაქტით იოლად გადამდებია. დაავადების პირველი აფეთქება 2000 წელს დუბლინში დაფიქსირდა, სადაც წითელათი დაავადების 1600 შემთხვევა გამოვლინდა, 100-ზე მეტი ბავშვი გართულებებით საავადმყოფოებში მოხვდა, ხოლო 3 ბავშვი დაიღუპა.

2006 წელს ინგლისში გარდაიცვალა 13 წლის ბიჭი, რომელიც 1994 წლის შემდეგ წითელას პირველი მსხვერპლი გახდა; 2008 წელს, პირველად 14 წლის განმავლობაში, დიდ ბრიტანეთში წითელას ეპიდემია გამოცხადდა; 2012 წლისთვის ინგლისსა და უელსში ექიმებმა წითელას დიაგნოზი დასვეს 2000-ზე მეტ შემთხვევაში, ის დიდწილად აღმოაჩნდათ ბავშვებს და მოზარდებს, რომელთა მშობლებმაც რამდენიმე წლით ადრე მათ აცრაზე უარი თქვეს; 2013 წელს წითელას ეპიდემიის კიდევ ერთი აფეთქება მოხდა უელსში - დაავადდა 1000-ზე მეტი ადამიანი, 88 - ჰოსპიტალიზებული იყო, ერთი - 25 წლის ბიჭი გარდაიცვალა.