ქართული ინტერნეტის განვითარების მიზნით პეტიცია შეიქმნა

შეიტანე წვლილი ქართული ინტერნეტ სივრცის განვითარებაში - ამ სათაურით ქართველმა ვებდეველოპერებმა პეტიცია შექმნეს.

მათი თქმით, Google-ის წესების მიხედვით, ქართულენოვან ვებგვერდებს არ შეუძლიათ AdSense პლატფორმის საშუალებით საიტზე რეკლამების დადება.

ამ პეტიციის მიზანი კი ამ ფაქტის შეცვლა და შედეგად ქართული ინტერნეტის წარმატების უზრუნველყოფაა.

AdSense არის Google-ის პლატფორმა, რომლის საშუალებითაც ვებგვერდის შემქმნელს შეუძლია დაფაროს ფინანსური ხარჯები სარეკლამო ადგილის გაქირავებით. AdSense-ს წესების მიხედვით ქართულ ენოვან საიტებზე აკრძალულია ამ სერვისის გამოყენება.

„იმისათვის რომ საქართველოში ღია და თავისუფალი ვებ პლატფორმების რაოდენობა გაიზარდოს, უმნიშვნელოვანესია ვებ დეველოპერებს ჰქონდეთ სერვერების, ლიცენზიების და ლოჯისტიკური ფასების რეკლამებით მიღებული შემოსავლით დაფარვის შესაძლებლობა. ამის გარეშე ისინი იძულებული არიან ყველა მათი შექმნილი საიტი იყოს კომერციალიზირებული. ზუსტად ეს ღია და თავისუფალი პლატფორმები, როგორიცაა საგანმანათლებელო საიტები, თავისუფალი საჯარო ფორუმები, საქველმოქმედო საიტები და თავისუფალი კომუნიკაციის მრავალი სხვა საშუალება, წარმოადგენს იმ ბაზას, რომელიც ეხმარება ხალხს თავისუფალი, ურთიერთდაკავშირებული და გლობალურად მოაზროვნე საზოგადოების ჩამოყალიბებაში. მაშინ როცა ქვეყნებს და საზოგადოებს შორის საზღვრები უფრო და უფრო სწრაფად იშლება, ვფიქრობთ, ასევე გუგლის ინტერესშია დაეხმაროს ასეთი პლატფორმების განვითარებას, ამით ის დაეხმარება ქართულ საზოგადოებას ამ ახალ გლობალურ რეალობასთან ინტეგრაციაში“, - ამბობენ პეტიციის ავტორები.