ამერიკელების დახმარებით ვაზიანში საბრძოლო მომზადების ცენტრი გაიხსნება

„ჩვენ ვიწყებთ ძალიან ამბიციურ პროგრამას - საქართველოს თავდაცვის მზადყოფნის პროგრამას, ჩვენს მთავარ სტრატეგიულ პარტნიორთან ერთად“, - განაცხადა დღეს თავდაცვის მინისტრმა ლევან იზორიამ.

მინისტრი წელს, ამერიკულ მხარესთან ერთად, ვაზიანში საბრძოლო მომზადების ცენტრის გახსნასაც აანონსებს. „წელს ვაზიანში გავხსნით  საბრძოლო მომზადების ცენტრს, რომლის ანალოგი არსებობს გერმანიაში, ამერიკის სამხედრო ბაზის ფარგლებში“, - განაცხადა ლევან იზორიამ.

მინისტრმა ამერიკის შეერთებულ შტატებში პრემიერისა და ქართული დელეგაციის ვიზიტიც შეაფასა.

მინისტრის განცხადებით, „ეს იყო უმნიშვნელოვანესი და ძალიან წარმატებული ვიზიტი, სადაც კიდევ ერთხელ გაესვა ხაზი, რომ ჩვენ ვართ მნიშვნელოვანი სტრატეგიული მოკავშირეები და ჩვენ სტრატეგიულ პარტნიორებთან ერთად, უმნიშვნელოვანესი წვლილი შეგვაქვს გლობალური უსაფრთხოების საქმეში“.

თავდაცვის მინისტრმა, ეს განცხადებები მეორე მსოფლიო ომში გამარჯვების დღესთან დაკავშირებით, ვეტერანებთან შეხვედრის შემდეგ გააკეთა.