გიორგი ქებურია 20 ათასი ლარის გირაოს სანაცვლოდ გაათავისუფლეს

ჯგუფ Birja Mafia-ს წევრი გიორგი ქებურია სააპელაციო სასამართლომ 20 ათასი ლარის გირაო სანაცვლოდ გაათავისუფლა. შესაბამისის შუამდგომლობა სასამართლო პროცესზე დაცვის მხარემ დააყენა. პროკურატურა ადვოკატების შუამდგომლობას დაეთანხმა. 

მანამდე სააპელაციო სასამართლომ პატიმრობიდან ჯგუფ „ბირჟა მაფიას “ კიდევ ერთი წევრი მიშა მგალობლიშვილი გაათავისუფლა. მოსამართლემ დააკმაყოფილა შუამდგომლობა, რომლის თანახმადაც,  ბრალდებულს აღკვეთის ღონისძიების სახით პატიმრობა 50 ათასი ლარის ოდენობის გირაოთი შეეცვალა. ამასთან, ბრალდებულს ჩამოერთმევა საზღვარგარეთის პასპორტი.

ჯგუფ Birja Mafia-ს წევრებს გიორგი ქებურიას და მიშა მგალობლიშვილს ბრალად ედებათ დიდი ოდენობით ნარკოტიკული საშუალების უკანონო შეძენა-შენახვა, რაც 8-დან 20 წლამდე ან უვადო პატიმრობით ისჯება.

გუშინ გიორგი ქებურია და მიშა მგალობლიშვილი დაკითხეს. ადვოკატის, გაგი მოსიაშვილის თქმით, გიორგი ქებურიამ მასზე განხორციელებულ ფსიქოლოგიურ ზეწოლაზე ისაუბრა. 

10 ივნისს, რეპერების მხარდამჭერი აქციები თბილისში, ზუგდიდსა და ბათუმში გაიმართა. აქციის მონაწილეები აცხადებენ, რომ გიორგი ქებურიას და მიშა მგალობლიშვილს პოლიციამ ნარკოტიკი ჩაუდო, რომ მათ იმ ვიდეორგოლის გამო სჯიან სადაც პოლიციელებს აშარჟებენ. მათ მუსიკოსების დაუყოვნებლივ გათავისუფლება მოითხოვეს.

რეპერებს სოლიდარობას უცხადებს ბერა ივანიშვილი.

პრემიერი გიორგი კვირიკაშვილი პარლამენტს ნარკოპოლიტიკის ლიბერალიზაციისკენ და რეფორმის დაჩქარებისკენ მოუწოდებს. 

"ნარკოტიკების ჩადება წარსულში უნდა დარჩეს", - ამბობს ვიცეპრემიერი და ენერგეტიკის მინისტრი კახა კალაძე.