ნარკოდანაშაულისთვის ბრალდებული თათრიშვილის პროცესზე ანა მარგველაშვილი დაიკითხა

თბილისის საქალაქო სასამართლოში ნარკოდანაშაულისთვის ბრალდებული მიხეილ თათრიშვილის სასამართლო პროცესზე ბრალდების 2 და დაცვის მხარის 6 მოწმე დაიკითხა. დღეს ის მოწმეები დაიკითხნენ, რომელთა დაკითხვა წინა პროცესზე, პროკურორის გამოუცხადებლობის გამო ვერ მოხერხდა. მათ შორისაა პრეზიდენტის შვილი ანა მარგველაშვილი და სიძე მინდია გოგოჭური. 

"მიხეილ თათრიშვილმა თავად ამოიტრიალა ჯიბეები დაკავების დროს და კანონსაწინააღმდეგო არაფერი ჰქონია,"-ამის შესახებ პრეზიდენტის სიძემ მინდია გოგოჭურმა დღეს გამართულ სასამართლო პროცესზე განაცხადა. მან დაკავების პროცესი გაიხსენა და განმარტა, რომ თათრიშვილი სასადილოში რამდენიმე პირმა დააკავა. მინდია გოგოჭურის თქმით,  ვინც თათარიშვილი დააკავეს, პოლიციელის ამომცნობი ნიშნები არ ჰქონიათ.

დაცვის მხარის მოწმის სტატუსით დღევანდელ პროცესზე დაიკითხა პრეზიდენტის ქალიშვილი ანა მარგველაშვილიც. მისი თქმით, ის დაკავების დროს თათრიშვილთან არ იმყოფებოდა, თუმცა ესაუბრა სასადილოს მომსახურე პერსონალს, რომლებმაც დაკავების დეტალები გაიხსენეს. მათი ინფორმაციით, დაკავება სასადილოს ტერიტორიაზე მოხდა. მარგველაშვილი განმარტავს, რომ მომსახურე პერსონალი შეშინებული იყო.

პროკურატურის მხრიდან ორი მოწმის სახით სამართალდამცველები გამოიკითხნენ. მათ შორის სურამის პილიციის განყოფილების უფროსი ვასილ ჭანკვეტაძე. მოწმეების განცხადებით, მათ უშუალოდ დაკავების პროცესში არ მიუღიათ მონაწილება. ერთ-ერთი მოწმე skype-ს მეშვეობით ჩაერთო, რომელიც აცხადებდა, რომ ნარკოტიკის ამიღების ფაქტს არ დასწრებია და ოქმის შედგენის პროცესი მშვიდ ვითარებაში მიმდინარეობდა, რასაც ის შორიდან აკვირდებოდა.

მომდევნო პროცესი 6 ივლის ჩაინიშნა, სადაც დაცვის მხარის ერთი მოწმე დაიკითხება. მხარეები ასევე დასკვნით სიტყვას იტყვიან. რის შემდეგაც მოსამართლე გადაწყვეტილების მისაღებად გავა.

წინა პროცესზე მიხეილ თათრიშვილი მოსამართლემ 10 ათასი ლარის გირაოს სანაცვლოდ დარბაზიდან გაათავისუფლა.

პრეზიდენტის შვილის, ანა მარგველაშვილის და სიძის, მინდია გოგოჭურის მეგობარი მიხეილ თათრიშვილი 17 მარტს დააკავეს. მას 18 აბი "სუბოტექსის" შეძენა-შენახვას ედავებიან.

18 მარტს პრეზიდენტის შვილმა Facebook-ზე გამოაქვეყნა ვიდეო, რომელშიც გოგოჭურმა და თათარიშვილმა ერთმანეთი გადაიღეს იმის დასტურად, რომ მათ ჯიბეებში არაფერი უდევთ. ანა მარგველაშვილმა განაცხადა, რომ თათრიშვილს სუბოტექსი ჩაუდეს. 20 მარტს ამ განცხადებას შს მინისტრი და მთავარი პროკურორი გამოეხმაურნენ და თქვეს, რომ პოლიციელების მიმართ მსგავს პრეტენზიებს მტკიცებულებები სჭირდება.

ანა მარგველაშვილი საქალაქო სასამართლოში