იაპონიის პრემიერი: Brexit-ის შემდეგ ბრიტანეთთან სიამოვნებით ვითანამშრომლებთ

იაპონიის პრემიერმინისტრი, სინძო აბე ამბობს, რომ Brexit-ის შემდეგ ბრიტანეთს ტრანს-წყნარი ოკეანის პარტნიორობაში (TTP) გასაწევრიანებლად „გაშლილი ხელებით“ დახვდება. ამის შესახებ Independent-ი წერს. 

„გულწრფელად მჯერა, რომ Brexit-ის უარყოფითი გავლენა მსოფლიო ეკონომიკაზე, მათ შორის იაპონიის ბიზნესსექტორზე, მინიმუმამდე იქნება შემცირებული“ - თქვა მან.

იაპონიის პრემიერმა გამოთქვა შეშფოთება იმის გამო, რომ ბრიუსელსა და ლონდონს შორის ბოლო დროს მოლაპარაკებები კრიტიკულ ფაზაში შედის და შესაძლოა, მხარეებმა Brexit-ზე შეთანხმებას ვერ მიაღწიონ. 
მისივე თქმით, დიდი ბრიტანეთი ევროკავშირიდან გასვლის შემთხვევაშიც შეძლებს, შეინარჩუნოს „გლობალური სიძლიერით აღჭურვილი ქვეყნის“ სტატუსი. 

ტრანს-წყნარი ოკეანის პარტნიორობის შექმნაზე აზია-წყნარი ოკეანეთის რეგიონის 12 ქვეყანა: აშშ, ავსტრალია, კანადა, იაპონია, მექსიკა, მალაიზია, პერუ, სინგაპური, ჩილე, ბრუნეი, ახალი ზელანდია და ვიეტნამი 2015 წელს 5-წლიანი მოლაპარაკებების შემდეგ შეთანხმდნენ. პარტნიორიობის მიზანი თავისუფალი ვაჭრობის ზონის შექმნაა.

ახალი სავაჭრო კავშირი მსოფლიოში ყველაზე მსხვილია და მსოფლიო ვაჭრობის მოცულობის თითქმის 40%-ს მოიცავს.

ლონდონსა და ბრიუსელს შორის Brexit-ის პირობების შესახებ ოფიციალური მოლაპარაკებები გასული წლის 19 ივნისს დაიწყო. დიდი ბრიტანეთის პრემიერმინისტრმა, ტერეზა მეიმ ქვეყნის ევროკავშირიდან გასვლის პროცედურის შესახებ დოკუმენტს ხელი 29 მარტს მოაწერა, მაგრამ ჯერ კიდევ არ არსებობს შეთანხმება ზოგ საკითხზე. მაგალითად, ჩრდილოეთ ირლანდიის საზღვარზე შემოწმების თავიდან აცილების გზებზე (ჩრდილოეთ ირლანდია, სადაც ისედაც საკმაოდ ძლიერია სეპარატისტული განწყობები, ღიად მიანიშნებს, რომ Brexit–ს არ შეეგუება).

გარდამავალი პერიოდი 2019 წლის 29 მარტს დაიწყება. სწორედ ამ დღეს დატოვებს დიდი ბრიტანეთი ევროკავშირს ოფიციალურად.