imedi /  13 აგვისტო 2017, 16:01 / სანდო წყარო

ტრამპი შარლოტსვილზე: ამერიკაში ძალადობის ადგილი არ არის

ვირჯინიის შტატის (აშშ) გუბერნატორი ტერი მაკოლიფი ულტრანაციონალისტებს დაშლისკენ მოუწოდებს:

"მოვუწოდებ თეთრი რასის უპირატესობის და ნაცისტების მომხრეებს, წადით სახლებში. ჩვენი საზოგადოება არ მიგიღებთ. გრცხვენოდეთ. პატრიოტების გარდა ყველაფერი ხართ. ჩვენ თქვენზე ძლიერები ვართ".

"ამერიკაში ძალადობის ადგილი არაა", - წერს აშშ-ს პრეზიდენტი დონალდ ტრამპი twitter-ზე.

 

შარლოტსვილში ულტრანაციონალისტები და მათი მოწინააღმდეგეები ერთმანეთს ფიზიკურად დაუპირისპირდნენ. დაიღუპა ერთი ადამიანი. არიან დაშავებულები. პოლიციამ ცრემლსადენი გაზი გამოიყენა. დააკავეს რამდენიმე ადამიანი. გამოცხადდა საგანგებო მდგომარეობა. FBI-იმ გამოძიება დაიწყო.

ულტრანაციონალისტები კონფედერაციის ობელისკების და სამოქალაქო ომის გენერლების ქანდაკებების დემონტაჟის გადაწყვეტილებას აპროტესტებენ და რასისტულ ლოზუნგებს სკანდირებენ. შარლოტსვილის მერმა პროტესტი სიძულვილის და რასიზმის გამოვლინებად შეაფასა.

"კუ კლუქს კლანის" (Ku Klux Klan, KKK) და მათი მოწინააღმდეგეების აქციები ივლისშიც გაიმართა.

ახალ ორლეანში კონფედერაციის ბოლო, მეოთხე ობელისკი 20 მაისს აიღეს, სამოქალაქო ომის გენერლის - 19 მაისს.

დემონტაჟის გადაწყვეტილება 2015 წლის დეკემბერში მიიღეს, კაროლინის ეკლესიის მრევლის 9 აფროამერიკელი წევრის ჩაცხრილვის შემდეგ.

კომენტარები ()