როენა ხუცურაული თავისუფალია

პროსტიტუციისთვის ადგილის გადაცემის ბრალდებით დაკავებულმა როენა ხუცურაულმა, რომელსაც გუშინ გირაო შეეფარდა, დღეს საპატიმრო დაწესებულება დატოვა.

ხუცურაულმა ციხიდან გამოსვლის შემდეგ ჟურნალისტების კითხვებს არ უპასუხა.

მას რუსთავის ქალთა ციხესთან ადვოკატი და ახლობლები დახვდნენ. პროსტიტუციისთვის ადგილის გადაცემაში ბრალდებულმა 30 ათას ლარიანი გირაო გადაიხადა. ადვოკატი კი აცხადებს, რომ ის გამოძიებასთან ითანამშრომლებს.

„აღიარა დანაშაული და გააგრძელებს გამოძიებასთან თანამშრომლობას. ჯერ სასამართლო განხილვები იქნება და დანარჩენს ვნახავთ“, - განაცხადა არჩილ დვალიშვილმა.

გაიხსნება თუ არა სასტუმრო „მამიდას“ ნაცვლად კათარზისი, ადვოკატისთვის უცნობია.

„არ ვიცი, ერთად ვკითხოთ. თუ გაიხსნება, ვეტყვი და აბონიმენტს დაგირიგებთ“, - უპასუხა ადვოკატმა ჟურნალისტებს.

დაცვის მხარემ გუშინ 20 000-ლარიანი გირაო მოითხოვა, პროკურატურა ჯერ პატიმრობას ითხოვდა, მოგვიანებით კი შუამდგომლობა 40 ათასლარიან გირაოზე დააყენა.

საბოლოოდ, ბრალდებულს 30 ათასლარიანი გირაო შეეფარდა. 

ხუცურაულს თანხის გადასახდელად 15-დღიანი ვადა ჰქონდა. მეორე ბრალდებულს ზინაიდა ქორიძეს ასევე გირაო, კერძოდ კი 20 ათასი ლარის გადახდა შეეფარდა.

შინაგან საქმეთა სამინისტროს ცენტრალური კრიმინალური პოლიციის დეპარტამენტმა პროსტიტუციის ხელშეწყობის და პროსტიტუციისთვის ფართის გადაცემის ბრალდებით, 8 მაისს თბილისში სულ 3 პირი დააკავეს.