ნიკა მელიასთვის დეპუტატის იმუნიტეტის შეჩერებაზე 26 ივნისს იმსჯელებენ

ნიკა მელიასთვის სადეპუტატო იმუნიტეტის შეჩერებაზე ხვალ იმსჯელებენ. საკითხს იურიდიულ და საპროცედურო კომიტეტების სხდომაზე განიხილავენ.

დეპუტატი გია ვოლსკი ამბობს, რომ გადაწყვეტილება ყველა აუცილებელი პროცედურის და სამართლიანი განხილვის განხილვის შედეგად მიიღება.

"დარწმუნებული იყავით, საკითხთან დაკავშირებით ყველანაირი სამართლებრივი არგუმენტი გათვალისწინებული იქნება. წინააღმდეგ შემთხვევაში გადაწყვეტილებას მხარს ვერავინ დაუჭერს. ძალიან საინტერესო დეტალები იქნება განხილული და ძალიან ბევრი დოკუმენტი დაიდება. უნდა შევისწავლით რა მასალებს მოგვაწვდის პროკურატურა. თუმცა რაც მე ვიხილე, მიგვიყვანა გარკვეულ საკითხებამდე: პირველია სახელმწიფო გადატრიალების მცდელობა და უამრავი ადამიანის დაშავება",- განაცხადა გია ვოლსკიმ.

სადეპუტატო იმუნიტეტის მოხსნის საკითხი ხვალ დაჩქარებულად განიხილება - ჯერ კომიტეტების სხდომაზე, შემდეგ კი სესიაზე. პარლამენტში მივა პროკურატურის წარმომადგენელიც, რომელსაც პარლამენტის წევრები კითხვებს დაუსვამენ. რაც შეეხება ნიკა მელიასთვის პარლამენტის წევრის სტატუსის შეჩერებას, ეს საკითხი მას შემდეგ დადგება დღის წესრიგში, თუ მას სასამართლო გაამტყუნებს და ბრალი დაუდასტურდება.

როგორც საპროცედურო საკითხთა კომიტეტის თავმჯდომარემ გიორგი კახიანმა განაცხადა, საკომიტეტო განხილვის შემდეგ, ხვალვე პლენარულ სხდომაზე გაიტანენ საკითხს, რათა პარლამენტმა იმსჯელოს ნიკა მელიასთვის სადეპუტატო იმუნიტეტის შეჩერების შესახებ. 

ბიუროს სხდომა დაპირისპირებით დაიწყო. 

პარლამენტის წევრს ნიკა მელიას საქართველოს გენერალურმა პროკურატურამ ბრალი წაუყენა. როგორც პროკურორმა განაცხადა ნიკანორ მელიას მიმართ გამოიკვეთა სისხლის სამართლის კოდექსით გათვალისწინებული დანაშაულის ნიშნები. 

პროკურატურამ საქართველოს პარლამენტს ნიკა მელიასთვის დეპუტატის იმუნიტეტის მოხსნასთან დაკავშირებით მიმართა. 

21 ივნისს შინაგან საქმეთა სამინისტროში ბრიფინგი გაიმართა, სადაც ითქვა, რომ ჯგუფური ძალადობის ორგანიზების საქმეზე გამოკითხვაზე დაიბარეს ნიკა მელია, გიგი უგულავა და ირაკლი ოქრუაშვილი. საქმე ეხება 19-20 ივნისის საპროტესტო აქციას.

20 ივნისს ღამით, პარლამენტის შენობის წინ სპეცრაზმმა რამდენჯერმე გამოიყენა ცრემლმდენი გაზი, ბოლოს კი აქციის მონაწილეები წყლის ჭავლით დაშალა, ასევე გამოიყენა რეზინის ტყვიები.

რუსთაველის გამზირზე აქცია მას შემდეგ დაიგეგმა, რაც პარლამენტის თავმჯდომარისთვის განკუთვნილი ადგილიდან მართლმადიდებლური საპარლამენტთაშორისო ასამბლეის წევრებს სიტყვით რუსეთის დუმის კომუნისტური პარტიის წევრმა სერგეი გავრილოვმა მიმართა და „ქართული ოცნების" წევრ ზაქარია ქუცნაშვილს მოწვევისთვის მადლობა გადაუხადა.

პარლამენტში მართლმადიდებლობის საპარლამენტთაშორისო ასამბლეის მიმდინარეობა შეწყდა. ზაქარია ქუცნაშვილმა კი მოიბოდიშა და თქვა, რომ ასამბლეის ჩასატარებლად არასწორი ადგილი შეარჩიეს.

მომხდარის გამო თანამდებობიდან გადადგა პარლამენტის თავმჯდომარე ირაკლი კობახიძე.