რუსი დეპუტატი საქართველოსთვის ეკონომიკური სანქციების დაწესებას ითხოვს

რუსეთის ფედერაციის საბჭოს საგარეო საქმეთა კომიტეტის თავმჯდომარის პირველი მოადგილე ვლადიმერ ჯაბაროვი საქართველოსთვის ეკონომიკური სანქციების დაწესებას ითხოვს. მისი თქმით, სანქციები უპირველეს ყოვლისა ქართული ღვინის იმპორტს უნდა შეეხოს. ამის შესახებ მან ჟურნალისტებს უთხრა. ინფორმაციას რუსული მედია ავრცელებს. 

„საქართველო პატარა ბავშვია, რომელსაც არაფერი ესმის, უნდა დააშავოს და მერე აპატიო. მაგრამ როდესაც 30 წელია, დამოუკიდებელი სახელმწიფო ხარ, საკუთარ ნაბიჯებზე პასუხი უნდა აგო. ვფიქრობ, სანქციები აუცილებელია. მე არ მომწონს, როცა ამბობენ, რომ ქართული ღვინის ხარისხი გაუარესდა. რატომ უნდა ვთქვათ ასე? ეს ხომ ყველას ღიმილს გვგვრის?! უნდა ვთქვათ პირდაპირ, რომ საქართველო მოიქცა არამეგობრულად და ამიტომ არ გვსურს ამ ქვეყანასთან ვაჭრობა. არ გვსურს, რომ თქვენ ჩვენს ქვეყანაში ფულს აკეთებდეთ. თუ რუსეთს აგრესორად თვლით, კეთილი ინებეთ და თქვენი ღვინო და პროდუქცია სხვა ქვეყნებში გაყიდეთ“, - თქვა ჯაბაროვმა.

ასევე ჯაბაროვი აცხადებს, რომ თბილისში გამართული ანტირუსული გამოსვლების გამო საქართველოს ხელისუფლებამ რუსეთს უნდა მოუბოდიშოს. 

„ვფიქრობ, პირველ რიგში ბოდიში საქართველოს პრეზიდენტმა უნდა მოიხადოს. თუ საქართველოს ხელისუფლება ვერ შეძლებს ამ პროცესების შეჩერებას, საქართველოს ისეთივე რყევები ემუქრება, როგორც უკრაინას, მაგრამ თუ გავითვალისწინებთ ქვეყნის მასშტაბს, შედეგები შეიძლება იყოს ძალიან მძიმე, რასაც ქართველ ხალხს ნამდვილად არ ვუსურვებ“, - აღნიშნა ჯაბაროვმა.

რუსეთის საგარეო საქმეთა მინისტრის მოადგილემ გრიგორი კარასინმა საქართველოში განვითარებულ მოვლენებზე მოსკოვის რეაქციას „ხისტი, თუმცა ადეკვატური ზომა“ უწოდა. ამის შესახებ გრიგორი კარასინმა ჟენევის დისკუსიების დაწყებამდე რუსულ გამოცემა „კომერსანტთან“ინტერვიუში განაცხადა.

დღეს ჟენევაში საერთაშორისო მოლაპარაკებების 48-ე რაუნდი გაიმართება. საქართველოს დელეგაცია ყველა იმ თემაზე მწვავედ და მკაფიოდ აპირებს საუბარს, რომელიც წინა რაუნდების დღის წესრიგის მთავარ ნაწილს წარმოადგენდა.

მოლაპარაკების ფარგლებში, დღის წესრიგით ასევე გათვალისწინებულია საკითხები დევნილთა უსაფრთხო და უპირობო დაბრუნების შესახებ, ასევე, ევროკავშირის შუამავლობით 2008 წელს რუსეთსა და საქართველოს შორის დადებული ცეცხლის შეწყვეტის შეთანხმებით გათვალისწინებული პირობები.

21 ივნისს, საღამოს, რუსეთის ფედერაციის პრეზიდენტმა ხელი მოაწერა ბრძანებას, რომელიც 8 ივლისიდან რუსულ ავიაკომპანიებს რუსეთის მოქალაქეების საქართველოში გადაყვანას უკრძალავს. გარდა ამისა, პუტინმა რუსეთის ხელისუფლებას საქართველოში მყოფი რუსეთის მოქალაქეების სამშობლოში დაბრუნების უზრუნველყოფა დაავალა.

როგორ აისახება პუტინის ბრძანება ქართულ ეკონომიკაზე? - ვრცლად წაიკითხეთ ამ ბმულზე.