კელი დეგნანი: ჩვენთვის მნიშვნელოვანია, რომ საკონსტიტუციო ცვლილებები პარლამენტის სრული მხარდაჭერით იყოს მიღებული

ყველას სურს, რომ შეთანხმების ორივე ნაწილი შესრულდეს. პარლამენტში ორი მოსმენა გაიმართა, რომელიც საარჩევნო კანონმდებლობის ცვლილებას შეეხებოდა დამდეგი არჩევნებისთვის. ეს იქნება დიდი წარმატება, თუ ცვლილებები პარლამენტში სრული მრავალპარტიული მხარდაჭერით გავა, - ამის შესახებ აშშ-ის ელჩმა კელი დეგნანმა ჟურნალისტებთან საუბარში განაცხადა.

„ჩვენ ძალიან მკაფიოდ ვთქვით, რომ შუამავლებს არ სურთ შეთანხმების დეტალებზე კომენტარის გაკეთება. 8 მარტის შეთანხმებას მიაღწიეს საქართველოს პოლიტიკურმა პარტიებმა და სწორედ ამაშია რეალური წარმატება, რომ პარტიები შეხვდნენ ერთმანეთს, შეძლეს სერიოზულ კომპრომისებზე წასვლა და მიაღწიეს შეთანხმებას. ახლა კი გვსურს, რომ შეთანხმების ორივე ნაწილი შესრულდეს. ახლა ორი კენჭისყრა გვქონდა შეთანხმების იმ ნაწილზე, რომელიც შეეხება საარჩევნო სისტემას მოახლოებული არჩევნებისთვის, ასევე უნდა შესრულდეს ერთობლივი განცხადება სასამართლო პროცესში პოლიტიკური ჩარევის და სელექციური სამართლებრივი დევნის შესახებ. აშშ-ის პოზიციაა, რომ საქართველოსთვის ნამდვილი მიღწევა იქნება თუ იგი საკონსტიტუციო ცვლილებებს სრული, მრავალპარტიული მხარდაჭერით მიიღებს. ამით გამოჩნდება რეალური ძალისხმევა დემოკრატიული პროცესის პროგრესისადმი და შექმნის პირობებს სამართლიანი არჩევნებისთვის ამ შემოდგომაზე. თუმცა ჩვენ გვესმის, რომ ზოგიერთი ოპოზიციური პარტიისთვის დამატებითი ნაბიჯების გადადგმაა საჭირო იმისათვისმ რომ შესრულდეს 8 მარტის შეთანხმების ერთობლივი განცხადების ნაწილი. იმედი გვაქვსმ რომ ეს მოხდება და შეთანხმება შესრულდება - განხორციელდება საკონსტიტუციო ცვლილებები და ჩატარდება საარჩევნო რეფორმა, რომელიც ახლა პარლამენტის წინაშეა და რომელიც მოიცავს ოდირის რეკომენდაციების ნაწილს იმის თაობაზე, თუ როგორ შეიძლება საქართველომ ოქტომბერში სამართლიანი და თავისუფალი არჩევნები ჩაატაროს. ჩვენი აზრით, ზოგიერთი ძალიან მნიშვნელოვანი დებულება არ არის ჯერ ამ კანონმდებლობაში გათვალისწინებული და იმედი გვაქვს, რომ ამ დებულებებსაც ვნახავთ კანონში. ეს დაარწმუნებს ამომრჩევლებს, რომ შეუძლიათ ხმის მიცცემა თავისუფლად, სამართლიან გარემოში. ვფიქრობ, ოპოზიცია ცდილობს შეთანხმების თავისი ნაწილი შეასრულოს, და ასევე ვფიქრობ, რომ მმართველი პარტიაც თავისი ნაწილის შესრულებას ცდილობს. ამ შეთანხმებას ორი ნაწილი აქვს. ამერიკის შეერთებულ შტატებს სურს ნახოს, რომ საქართველოს პარლამენტი სრული შემადგენლობით მიიღებს საკონსტიტუციო ცვლილებებს და წარმატებით შესრულდება 8 მარტის შეთანხმება“, - განაცხადა დეგნანმა.

23 ივნისს პარლამენტის პლენარულ სხდომაზე საკონსტიტუციო ცვლილებებს კენჭი მეორე მოსმენით უყარეს. კანონპროექტს მხარი დაუჭირა 115-მა დეპუტატმა, 3-მა კი წინააღმდეგ მისცა ხმა. რეგისტრაცია გაიარა 119-მა დეპუტატმა. „ნაციონალურმა მოძრაობამ“ და „ევროპულმა საქართველომ“ კენჭისყრაში მონაწილეობა არ მიიღეს და ამის მიზეზად გიორგი რურუას პატიმრობაში დარჩენა დაასახელეს.