შალამბერიძე ირანის თემაზე გაკეთებულ ანტისახელმწიფოებრივ განცხადებებზე: ცდილობენ, დააზიანონ საქართველოს ინტერესი აშშ-ს თვალში იმ ფონზე, როდესაც საქართველოს ხელისუფლების წარმომადგენლები თეთრ სახლში წარმატებულ ვიზიტს ახორციელებენ

პარლამენტის რეგიონული პოლიტიკისა და თვითმმართველობის საპარლამენტო კომიტეტის თავმჯდომარის პირველმა მოადგილემ, ზვიად შალამბერიძემ „დღის ქრონიკაში“ ირანის თემასთან დაკავშირებით ბოლო დღეებში გაკეთებული საჯარო ანტისახელმწიფოებრივი განცხადებები და გამოქვეყნებული კვლევები შეაფასა. შალამბერიძე აღნიშნავს, რომ ეს კვლევები მოკლებულია ყოველგავრ ფაქტებსა და არგუმენტებს.

„თინა ხიდაშელი, სალომე ზურაბიშვილი და ლუკ კოფი აშ-ში, რამდენჯერმე, ერთობლივად მონაწილეობდნენ ღონისძიებაში, რომელიც იმართებოდა საქართველოს წინააღმდეგ. მაგალითად: პირველი იყო 2024 წლის სექტემბერი, მონაწილეობდნენ ღონისძიებაში, რომელსაც ერქვა „ანტიამერიკული მობრუნება“. შემდეგი ღონისძიება იყო 2025 წლის იანვარში, და ამ ღონისძიებაშიც ერთად მონაწილეობდნენ. ამ ბოლო პერიოდის განმავლობაში, აი ასე, ასე შეხმატკბილებულად მუშაობდნენ.

ეს პოზიცია არ არის ამერიკის ადმინისტრაციის, ეს არის ერთ-ერთი ექსპერტი, რომელიც გამოირჩევა საქართველოს ხელისუფლების საწინააღმდეგო განცხადებებით და მასთან ერთად რაღაც კვლევა გააკეთეს, რომელიც მოკლებულია ყოველგავრ ფაქტებსა და არგუმენტებს. ახლა ცდილობენ, თავისი მოსაზრებები საქართველოს მოახვიონ და როგორმე დააზიანონ საქართველოს ინტერესი აშშ-ს თვალში იმ ფონზე, როდესაც საქართველოს ხელისუფლების წარმომადგენლები ახორციელებენ წარმატებულ ვბიზიტს თეთრ სახლში“, - აღნიშნა ზვიად შალამბერიძემ.

როგორც ცნობილია, ბოლო დღეების განმავლობაში გაკეთებულ განცხადებებთან დაკავშირებით სახელმწიფო უსაფრთხოების სამსახურმა გამოძიება დაიწყო.

გიორგი კანდელაკის და ლუკ კოფის ერთობლივი კვლევა, სათაურით „საქართველოს ირანული შეტრიალება: თეირანის გავლენის სწრაფი გაფართოება ერთ დროს ამერიკის ძლიერ მოკავშირე ქვეყანაში“, ჰადსონის ინსტიტუტმა“ გამოაქვეყნა, კვლევაში ავტორები ცდილობენ ამტკიცონ, რომ საქართველოში ირანის გავლენები გაიზარდა.

ერთ-ერთი ტელეკომპანიის ეთერში გენერალ-მაიორმა ვახტანგ კაპანაძემ იმ სტრატეგიულ ობიექტებზე ისაუბრა, რომლებიც შესაძლოა ირანის სამიზნე გახდეს და მიუთითა, რას იზამდა თავად ირანის ხელისუფლების ადგილზე.

ახლო აღმოსავლეთში მიმდინარე პროცესების პარალელურად, მორიგი შეტევა და უსაფუძვლო ბრალდებები საქართველოს მიმართ - სტატია სათაურით „საქართველო ირანისთვის სანქციებისთვის თავის არიდების ცენტრად იქცევა“ The Hill-ში გამოქვეყნდა.

თავდაცვის ყოფილმა მინისტრმა, არასამთავრობო ორგანიზაცია „სამოქალაქო იდეის“ თავმჯდომარემ, თინა ხიდაშელმა განაცხადა, რომ საქართველოში ტერორისტების სკოლა, ე.წ. უნივერსიტეტი ფუნქციონირებს.