კომუნიკაციების კომისიის თავმჯდომარე: ეს რეგულაციები არავითარ შემთხვევაში არ არის მიმართული არც ერთი მედიის შეზღუდვისკენ, პირიქით, უნდა გაჯანსაღდეს მედია გარემო

„მოგეხსენებათ, რომ მედიას ინფორმაციის გავრცელებასთან ერთად, ფუნდამენტური სოციალური დანიშნულება გაქვთ, რასაც დიდი პასუხისმგებლობა ახლავს თან. მაუწყებლები მაყურებელზე მნიშვნელოვან გავლენას ახდენთ“, - ეს განცხადება კომუნიკაციების კომისიის თავმჯდომარე გოგა გულორდავამ გადაცემა „იმედი LIVE“ - ში გააკეთა, სადაც მედიას კანონისა და მაყურებლების წინაშე არსებული ვალდებულებები შეახსენა.

გოგა გულორდავას განცხადებით, კომუნიკაციების კომისია, როგორც მაუწყებლობის სფეროს მარეგულირებელი დამოუკიდებელი სახელმწიფო უწყება, პასუხისმგებელია უზრუნველყოს გამოხატვის თავისუფლება, მედიაპლურალიზმი და სტაბილური მედია გარემო ქვეყანაში. მისივე თქმით, მედია პლურალიზმი და სიტყვის თავისუფლება, დემოკრატიული სახელმწიფოსთვის, მაყურებლებისთვის, მთელი საზოგადოებისთვის არის უმნიშვნელოვანესი.

„2025 წლის აპრილიდან განხორციელდა ცვლილებები კანონში და რეგულირების ქვეშ მოექცა ისეთი საკითხები, როგორებიცაა: ფაქტის ჯეროვანი სიზუსტე და პასუხის უფლება, სამართლიანობისა და მიუკერძოებლობის, ასევე ადამიანის ღირსებისა და პირადი ცხოვრების პატივისცემა. თუმცა ხაზგასმით უნდა ვთქვათ, რომ მაუწყებლობის ქცევის კოდექსით, რომელიც 2009 წელს არის მიღებული, მანამდეც არეგულირებდა და რამე განსაკუთრებულ სიახლესთან ადგილი ამ შემთხვევაში არ გვქონია. და პასუხისმგებლიანი მედია, რომელიც იცავს ჟურნალისტიკის მაღალ სტანდარტებს, ამ სტანდარტებით ისედაც უნდა ეხელმძღვანელა. თუმცა სამწუხაროდ, წლების განმავლობაში მაუწყებელთა ქცევის კოდექსი ვერ სრულდებოდა და შესაბამისად, საკანონმდებლო გადაწყვეტილებით ეს შინაარსობრივი რეგულაცია გადავიდა უკვე კანონის მოქმედების სფეროში“ - განაცხადა კომუნიკაციების კომისიის თავმჯდომარემ.

მისივე ინფორმაციით, კანონში ცვლილებების შემდეგ კომუნიკაციების კომისიამ შეიმუშავა გზამკვლევი, რომელიც მაუწყებლებს შინაარსობრივი რეგულირების შესახებ დეტალურ ინფორმაციას აძლევს, მათ ჰქონდათ შესაძლებლობა კანონის აღსრულების დაწყებამდე შეეცვალათ სარედაქციო პრაქტიკა. ასევე, აღნიშნა, რომ კომისიაში შესული პირველი საჩივრების განხილვის შემდეგ, დარღვევები დადასტურდა, მაგრამ მაუწყებლები გათავისუფლდნენ პასუხისმგებლობისგან.

„კანონის მიღების შემდგომ, კომისიამ შეიმუშავა ძალიან მნიშვნელოვანი დოკუმენტი შინაარსობრივ რეგულირებასთან დაკავშირებით, რომელმაც ძალიან მკაფიოდ განმარტა, თუ რას ნიშნავს სამართლიანობა, მიუკერძოებლობა, რა არის პატივისა და ღირსების შემლახავი, როგორ უნდა გაიმიჯნოს მოსაზრება ფაქტისგან, ასევე ძალიან მკაფიოდ არის განსაზღვრული, თუ რაზე გაამახვილებდა კომისია ყურადღებას და რა იქნებოდა შეფასების კრიტერიუმები ამა თუ იმ გადაცდომის აღმოჩენის შემთხვევაში. ნიშნადობლივია, რომ ეს დოკუმენტი მაუწყებლებს დაეგზავნათ გასული წლის, 2025 წლის სექტემბერში, თუმცა, უცნაურად და ასაკვირად, არც ერთ მაუწყებელს შენიშვნა ან კომენტარი არ გამოუთქვამს.“ - განაცხადა კომისიის თავმჯდომარემ მედიას.

გულორდავას თქმით, ერთ-ერთი პირველი შეხვედრა სწორედ ტელე მაუწყებლებთან გამართა, სადაც მაუწყებლებს თანამშრომლობის მზაობა დაუდასტურა.

„შევთავაზეთ მედიას, რომ გვემსჯელა ყველა იმ გამოწვევაზე, მათ შორის რეგულაციებთან დაკავშირებით, თუ არსებობდა დამატებით რაიმე კითხვები, თუ როგორ უნდა შედგეს სარედაქციო პოლიტიკა, რას გულისხმობს კანონი, - მაგრამ, ვერც ამ შეხვედრის შედეგები ვერ მივიღეთ. მიუხედავად საშეღავათო პერიოდის მიცემისა, როგორც უკვე აღვნიშნე კანონი მიღებულია დაახლოებით ერთი წელია, კომისია, როგორც კანონზე რეაგირების მომხდენი უწყება, ჯერ კიდევ რჩება საჩივრებზე რეაგირების რეჟიმში და არ შესულა შინაარსობრივი რეგულირების ნაწილში“, - განაცხადა გულორდავამ.

მისივე ინფორმაციით კანონნის ამოქმედების შემდეგ კომისიამ განიხილა 10-მდე საჩივარი, საიდანაც 4 საჩივარში - დადგინდა დარღვევა, მაგრამ მაუწყებელი გათავისუფლდა პასუხისმგებლობისგან; 5 საჩივრის შემთხვევაში - დარღვევა არ დადგინდა; 1 საჩივარი კი განხილვაშია.